Shillong, Lber 01: U State Chief Information Commissioner jong ka jylla Meghalaya u bah H. Nongpluh haba kren plie ia ka jingialang ba ar sngi jong ka Standing Conference of Public Enterprise (SCOPE) kaba la long ha Vivanta Shillong, la ong ba ka ain Right To Information Act, 2005 kam don ka jingiada ia ki Public Information Officer (PIO).
Haba kren ha kane ka sngi sdang jong ka jngialang kaba ar sngi ban ia tai halor ka RTI Act, la ong ba don ki briew kiba la pyndon kam ia ka RTI ban pyndik ia ki ophisar, ha kane ka bynta ka ain kam don ka jingiada ia ki ophisar, wat la ka ain kam don hynrei kinnym ailad.
Ha kane ka sngi u State Chief Information Commissioner, la ong ba ka dei ban don ka jingpyniapher ha ka jingtrei kam hapdeng ki PIO bad ki ophisar kiba dei ha ka kyrdan Appellate Authority, namar lada kiba pan RTI kin hun ia kaba ki ioh na PIO kin leit sha u ophisar ba bat ia ka kyrdan Appellate Authority.
Kane ka ain RTI Act kam dei ka jaka ban weng ia ki jingeh hynrei bun sien kala long ka jaka ba lah ban ia pynbeit ia ki jingeh kiba ia kynduh, hynrei bun sien ki PIO kila don ha ka jingmut jong ki kumno ban wat dong ha kaba ki ioh ia ka RTI ban lait ka jingjubab ia ki jingpan jingshai.
Ki PIO ha kane ka ain ka long ban iarap ia ki paidbah bad ha ka juh ka por ban iada ia ka tnad sorkar dei kane ka daw ba ki ophisar ba bat ia ka kyrdan Appellate Authority kin kham pynjngai na ki PIO. Kane ka ain ka shah ia ki briew ban wat jingtip na ka sorkar.
Ka jylla Meghalaya mynta kala thung ia ki Opisar ban peit ia ka tnad sorkar ha kaba ia dei bad ka RTI, Act katkum ka rai jong ka iing bishar kaba ha khlieh duh jong ka Ri India ba ki tnad sorkar kin ai jingtip, ym bat ap haduh ban da don ba wat jingtip na ka tnad sorkar ka sorkar kala thung shibun ki Nodal Offcier.
Kane ka ain ka don’ tang 31 tylli ki kyndon bad kiba ia dei bad ka jingtreikam jong ki long tang ka kyndon kaba 4, ka kyndon kaba 8 bad 9, kum juh ka kyndon 18 bad 19 kaba don bad ki Appellate Authority.
U bah H Nongpluh u ai ka jingkhublei ia baroh ki 80 ngut tam kiba la wan na kylleng ka Ri India sha kane ka jingialang kaba la long ha Shillong mynta ka sngi bad ka ban kut la shau ka sngi ha ka jingiadonlang u Heeralal Samariya, IAS ba la shong that ba dei u Chief Information Commisioner jong ka Ri India.
