Shillong, Nailur 03: Ka seng ki nongniah kali tourist ka All Khasi Meghalaya Tourist Taxi Association (AKMTTA) ka la pynbna ba naduh ka 16 tarik mynta bnai kan pynlong strike ha kylleng ka Khasi bad Jaintia.
Ia kane ka AKMTTA ka la pyntip hynne ka sngi hadien ba la wai ka jingialang ba la long ha Shillong club ha kaba la wan ban shimbynta da ki association ba na ki district ba pher ba pher.
Ha ka jingiakren sha ki nongthoh khubor u bah Ricaldinus Dohling u la iathuh ba ka seng ka pynlong ia kane ka strike ka dei shi bynta halor ka jingkynduh jingeh ki kali tourist ka jylla, ba ki kali tourist ba nabar ki la knih lud ia ka kamai ba dei hok ban ioh da ki nongniah kali trai jylla.
Kane ka jingiakhih kin nym khang ia ki nongwan shangkai pyrthei ha ka jylla Meghalaya, hynrei kan dei tang ia ki kali tourist kiba wan nabar ba kin kut tang Shillong lane ba kino kino ki hotel lada ki nongwan jngohkai lada ki la dep book lypa. Katba na Shillong sha ki jaka jngohkai pyrthei. Kin pynpoi ki kali tourist ba na ka jylla.
U la pyntip ba kane ka strike kan sdang naduh ka por 5 baje mynstep jong ka 16 tarik bad kan iai bteng, lada ka sorkar kam sngap ia ka jingdawa ki.
