New Delhi, Iaiong 12: ka jinglang hapdeng ka tnad kam poh iing ka sorkar Bilat bad ka sorkar India kala long ha Delhi Mynta ka sngi, ka Ri India kala dawa na ka ri Bilat ba kan pynshitom ia kito kiba kyrshan iaki lehnoh Khalistan kiba sah ha Bilat.
Ha kane ka jingiakren ia ka kynhun na ri Bilat la ialam da u Matthew Rycroft bad na ka Ri India la ialam da u sekrettari ka tnad kam poh iing u Ajay Kumar Bhalla ha ka jingiadon ki heh sorkar na baroh ar tylli ki Ri.
Ha kane ka jingialang na baroh ar tylli ki ri, kila ia kren ia kaei kaba kine ki ar tylli ki ri ki juh ia treilang bad kin dang shim ruh ia ki lat ki lynti ban dang pynkhlain shuh shuh ia ka jingiatreilang hapdeng kine ki ar tylli ki ri.
Ki bynta kiba ha khmat eh kiba la buh ha kane ka jingiakren ka long ban iakhun pyrshah ia ki kam lehnoh, ban pynkhlain ia ki jingiada ia ki kor internet bad ka jingiashallan ha ka pyrthei, ban ia khun pyrshah ia ki kam kahii drok, ka jingphet shnong ki briew.
Ban pynphai ia kiba phet rieh, ia ki kam pyrshah India kaba ki leh ha ri Bilat kynthup ia kiba kyrshan ia ki lehnoh Khalistan bad kiwei ki phang, ha kane ka jingiakren ka India kala kren shai bha ia ka jingpyndon kam bakla ia ka jingpan ban phetrieh sha katei kaba ki iarap ia ki lehnoh ha India.
Na ka liang jong ka India ha kane ka jingiakren kala dawa na ka ka sorkar Bilat ba kan shim ia ki lat ki lynti kumno ban leh katkum ka ain ia kito kiba sah ha katei ka Ri kiba ai jingkyrshan ia ka kynhun lehnoh Khalistan bad la pynpaw ia ka jingbym biang ia ki lat jingiada ka ophis jng ka Indian High Commission.
Ha kane ka jingialang baroh ar tylli ki Ri kila pynpaw ia ka jingsngew kmen ia kaei kaba mih na kane ka jingiakren ban dang pynkhlain shuh shuh ha kane ka jingiadei hapdeng ki ar tylli ki Ri khatam ha ka jingiadei badki kam iada Ri.
