Shillong, Rymphang 25: U Nongialam ka liang pyrshah hapoh ka iing dorbar tahwain ka jylla u Dr Mukul Sangma mynta ka sngi u la ong ba ka party Congress kan shim ia baroh ki lat ki lynti ban pynbor ia kane ka sorkar Meghalaya Democratic Alliance (MDA) ia ka jingujor kaba kala dep ban ai hapoh jong ka High Court jong ka jylla Meghalaya pyrshah ia ka rai jong ka Lokayukta ban tohkit halor ka jingkhaii dewiong beain.
Haba kren ha ki lad pathai khubor u la ong ba kane ka jingujor jong ka sorkar MDA ha HCM pyrshah ia ka rai jong ka Lokayukta ban phah tohkit ha kaba ia dei bad ka jingphah tokit halor ka kam khaii dewiong beain, ka sorkar ka dei ban weng noh mardor ia kane ka jingujor ka sorkar jylla bad kane ka jingdawa ka sdang naduh mynta ka sngi.
U Dr Mukul u la ong ba kane ka jingujor jong ka sorkar, imat ka don ka jingthmu ban iada iano re iano, lane ban pynslem ia ka jingphah tohkit ban ialat ia ki briew kiba don ha ka bor ban pynjah ia ki sabut, hynrei kynmaw ba lada pynjah ia ki sabut ruh kin ngat ha ka jingpynshitom jong ka ain.
Dei halor kane ka nongrim ban ialeh pyrshah ia ki kam bamsap ka sorkar ha u snem 2014 kala pdiang ia ka Meghalaya Lokayukta Act ban, ka jingthmu jong ka ka long ban teh lakam ia ki kam bamsap, lada ka sorkar kam leh ei ei kane ka ain kan nym don jingmut.
U Dr Mukul u la ong ba ki sngewtynnad ban iohi ba kane ka kynhun ba buh kyrpang ban shim jingtohkit halor ki jingkynnoh ba don ki kam bamsap kala shim khia bad kala pynmih ia ka rai ban phah tohkit hynrei balei ka sorkar ka ujor pyrshah ia ka rai jong ka Lokayukta sha HCM.
U Nongialam ka liang pyrshah u la ong u ei u ta u briew ba don bor ban ong ba ka sorkar ka dei ban ujor sha High Court pyrshah ia ka rai jong ka Lokayukta, na ka liang jong ka party Congress kan nym aili bad kan pynbor ia ka sorkar ba dei ban weng ia kane ka jingujor, la ong ba ki briew jong ka jylla Meghalaya kam lah ban shah ia ki kam bamsap.
U Dr Mukul u la pynrem jur ia kane ka sorkar MDA ba ka khlem lah ban thung ia ki briew ban don hapoh ka jong ka Lokayukta ba kan trei kam pura, kane ka sorkar kam kwah ban iohi ba kane ka Lokayukta kan nym trei kam, la ong ba ki don shibun ki jingkynnoh bamsap pyrshah ia kane ka sorkar hynrei ia mynta kin shimkhia bha tang ia kane ka kam khaii beain dewiong.
ka jingdon ia ka Lokayukta ka long ban long ka kynhun kaba laitluid ban tohkit pyrshah ia ki bor kiba halor lada don kano kano ka jingshhah kynnoh bamsap ia ki briew kiba don ha ka bor.
