Shillong, Risaw 22: U Myntri ba dei peit ia ka tnad pathai khubor u James K Sangma mynta ka sngi u la plie ia ka ophis thymmai jong ka Directorate of Information and Public Relation (DIPR) ha Lower Lachumiere.
Ha ka jingkren kum u kongsan ha kane ka jingialang kaba lyngkot na ka liang jong u myntri u la ong ba kane ka ophis ka long kaba don kam namar ha kane ka juh ka iing ka don lang ka Passport Kendra jong ka sorkar pdeng bad ka Shillong Press Club.
Kane ka ophis kaba dei ka tnad ba dei peit ia ki kam pathai khubor ka don ka bynta kaba khraw bha namar dei lyngba jong ka ba la pyntip sha ki paidbah ia ki skhim kiba ka sorkar ka don ban pyntrei na ka bynta ka jingmyntoi u paidbah ha ka jylla baroh kawei.
La ong ba da ka jingkylla jong ka por la don kam ban kyntiew shuh shuh ia kane ka tnad sorkar namar ka jingmih kine ki lat pathai khubor kiba thymmai ia kiba la tip kum ki New Media ha kaba la don kam ia ki namar ki long ki lad pathai khubor kiba khlain ha kane ka juk kaba mynta.
Da ka jingpyntrei kam ia ka Single Window Agency kane kala dang pynkhia shuh shuh ia ka jingtrei kam jong kane ka tnad sorkar, u myntri u la ai khublei kyrpang ia ki nongtrei ka DIPR namar wat hapdeng kane ka jinglong kane ka khlam COVID-19 kila trei khlem shong thiat ban ai jingtip sha ki paidbah.
Na ka liang jong u myntri u James u la ai khublei kyrpang ia u myntri ba dei peit ia kane ka tnad u bah AL Hek u Dirrctor ba rim u Bah Himalaya Shangpliang Director ba rim bad mynta u dei u MLA bad ia baroh ki ophisar kiba la don kti ha kaba pynlong ia kane ka ophis ba kan dep kum kaba ka long mynta.
Ha kane ka sngi ia ka jingkren pdiang burom ha kane ka jingialang la kren da ka kong Matsiewdor W Nongbri Secretary bad ia ka jingkren ai khublei la kren da u Director u bah Batlang Sohlya, ki ophisar ka DIPR, ha kane ka sngi la don lang u President ka MEPA Bah Monak Shabong, ki nongthoh khubor ban ia sakhi lang ia ka jingplie iakane ka ophis ba thymmai jong ka DIPR.
