Nongpoh, Lber 18:Ka Ri Bhoi Youth Development and Social Ornagisation (RBYDSO) Central Body ka ai khublei kitbok kitwriang ia baroh ki MDC jong ka ri lum Khasi-Jaintia kiba la jop don burom ha kane ka elekshon kaba dang shu dep shen ha ki ar tylli ki Autonamous District Council ba kynthup ia ka Khasi Hills Autonamous District Council bad Jaintia Hills Autonamous District Council.
Ka seng ka ai khublei kitbok kitwriang kyrpang ia ki san ngut ki MDC jong ka Ri Bhoi District kiba kynthup ia u Bah Victor Rani 1-Jirang, Kong Rona Khymdeit 2-Nongpoh, Bah James Sylliang 3-Mawhati, Bah Donkupar Sumer 4-Umsning bad u bah Albinus Lyngdoh 5-Umroi konstitwensi ba kin ai ka jingshakri kaba pynhun ia ki paidbah ha kine ki san snem ki ban wan.
Ha kawei liang, ka seng ka kitbok kitwriang ruh ia ka Executive Commmitee ba thymmai jong ka KHADC hapoh ka jingialam jong u Bah Arden Miller Basaiamoit kum u Chief Executive Member (CEM) ryngkat ruh ia ka kynhun synrop lang ki party riewlum kaba la tip kum ARPA ban ialam ia ka Executive Committee ha KHADC.
Shuh shuh ka seng ka kyrmen ruh ba kane ka Executive Committee kan neh haduh ba kut jong ka san snem bad kan thaw ruh ia ki lad ki lynti ba kan nangpynkhlain shuh shuh ia ka rukom treikam jong ka District Council katkum ka riti synshar jong ka ri India kaba la kdew ha ka Sixth Schedule to the Constitution of India bad katkum ka jingdawa jong ka kam na bynta ban iada ia ka ri bad ka jaidbynriew.
Ha kajuh ka por, ka kyntu ia ka Executive Committee ba thymmai ba kan ialeh ban thaw ki lad ki lynti ban pynkylla noh ia ka Assam and Meghalaya Autonamous District (Constitution of District Council) Rules 1951 sha ka Meghalaya Autonamous District (Constitution of District Council) Rules jong ka jylla Meghalaya. La pynkut u samla Hilarius Suting, Agriculture Secretary RBYDSO sengkmie.(SP News)
