Shillong, Naitung 08: U Chief Executive Member jong ka KHADC u bah Titosstarwell Chyne haba jubab ia ka jingkylli u bah Carnes Sohshang haba ia dei bad ka jingthied jaka ha Mawkyrwat, la ong ba ha u snem 2014 ka ophis kala thied ia ka jaka, hynrei ki dulir kim don ha ophis.
U bah Titosstarwel Chyne la pynsngew hapoh ka iing dorbar ba ia ka dulir bala shu Xerox la wan ban ai sha ophis ha u snem 2015 por ba long CEM u bah PN Syiem ha kato ka por, na kane ka jingthoh ka paw ba ka KHADC kala dep banthied ia ka jaka ha Mawkyrwat.
U CEM ka KHADC u la iathuh ha poh ka iing dorbar ba ia katei ka jaka bala thied ha u snem 2014 dei ha ka por jong long CEM u bah Ardent Miller Basaiawmoit ha kaba u la soi ha ka dulir ia thied khyndew, hynrei kane ka dulir kam don ha KHADC, na ka liang jong ka KHADC kan sa thung ia ka kynhun tohkit ban lap ia ka jingshisha.
Na ka dulir kaba la ioh Xerox na ki riew rangbah ka paw ba ka KHADC kala dep ban siew ia ka pisa T.35,25,039/- tyngka bad ka jingeh ha kane ka jaka ka long 11,750.13 phut sawdong.
Ha ka jingkylli bynrap u bah Carnes u la ong balei ka District Council kam shim noh ia katei ka jaka, na ka liang jong u CEM ba dei peit ruh ia ka tnad khyndew ,la iathuh hapoh ka iing dorbar ba u la wat ia kane ka dulir kam don ha ophis.
Kaei kaba ka ophis ka don ka long ba ha u snem 2015, ka KHADC kala shim ia ka jaka ha Rangmaw bala ai ei da ka jingkular ba ka KHADC kan thung kam ia ar ngut na ka iing ba ai ia kane ka jaka bad ka KHADC kala dep ban leh ia kane ka jingiateh kular.
Haba ia dei bad katei ka jaka ka ophis kan sa thung ia ka kynhun tohkit ban lap ia ka jingshisha baroh bad ka District kan sa pynkhreh ban shimti ia katei ka jaka la pynshai u CEM hapoh ka iing dorbar.
U CEM u la kren shai hapoh iing dorbar ba ka jaka ba don mynta ha Rangmaw dei kaba la ai sngewbha sha ka KHADC ha u snem 2015, ha ka por jinglong CEM u bah PN Syiem bad kala don ka jingiateh kular ban ai kam ar ngut na ka iing, katba ka jaka bad a thied bad la dep ban siew pisa ha ka por jinglong CEm u bah Ardent Miller Basaiawmoit ki dulir kim don ha ophis.
