Shillong, Lber 05: U Chief Electoral officer jong ka jylla Meghalaya u P Niak u la iathuh ba ka Election Commision jong ka Ri India kala pynbna mynta ka sngi ia ka MP election sha Lok Sabha bad ha ka jylla Meghalaya kan long ha ka 9 tarik jong u bnai Iaiong u ban wan.
La ong ba ka jingthep kyrteng na ka bynta kane ka Election MP kan sdang naduh ka 15 tarik mynta u bnai bad kan kut ha ka 22 tarik une u juh u bnai. Kito kiba kwah ban wengnoh ia lade na kane ka jingiakhun kan long ha ka 26 tarik, ka election kan long ha ka 9 tarik u bnai Iaiong bad ka jingniew vote kan long ha ka 16 tarik jong u bnai Jymmang.
Na ka bynta ban pyniaid ia kane ka election MP ka jylla ka don kam haduh 79 kompeni ki kynhun pulit ban pahara ha ka jylla. La iathuh ba ki don haduh 138 tylli ki jaka thep pud ha khap bad ka jylla Assam bad 90 tylli ha khap bad ka Banglades,
Ka jingia thep ha kane ka jylla Meghalaya kan long ha ka juh ka por ha baroh ar tylli ki Lok Sabha Constituency ka Shillong bad ka Tura. Ki nong thep vote ha kane ka jylla ki don 1553028, na kine ki kynthei ki don 783317 ngut bad ki shynrangki don 769711 ngut. Ki jaka thep vote ki don 2562 tylli.
Ka sorkar pdeng kan pynlut kumba 29 klur na ka bynta ban pynlong ia ka election MP ha kane ka jylla bad ha kane ka jingthep vote kaba mynta ki briew ki lah ban jied ruh lada kim mon iano iano ia kaba la thoh “ Non of the above”.(SP News)
