Shillong, Iaiong 12:Ka Election Committee ba la jied da ka CEC jong ka Khasi Students’ Union (KSU), ban pyniaid ia ka ilekshon kaba XV (15) sha ka ophis trei kam jong ka KSU nakabynta ka samoi trei kam 2023-2026.
Da kane la pynbnaiar lyngba kane ka kyrwoh ba ka ilekshon kan long ha ka 06 tarik u Jymmang, 2023naduh ka por 8 bajemynstep haduh 3 bajejanmied ha Dinam Hall, Jaiaw, Shillong.
Ha kaba iadei bad kane ka phang, kane ka Committee ka khot ka wer ia baroh ki khun samla kiba la ih jong ka Bri u Hynniewtrep, khamtam na ka liang ki dkhot jong ki unit bapherbapher ka KSU ba kin mih shakhmat ban iakitiabah lem ia ka lyngkor ba khia jong ka KSU naka bynta ka ri bad ka jaitbynriew.
Ka jingiabah lem ia ka lyngkor ka long da kaba iashimbynta shitrhem kum ki kyrtong ha katei ka ilekshon. Ia ki jingtip ba bniah halor kane ka kam lah ban ioh na ka ophis trei kam ka KSU ha Jaiaw Chapel Road, Shillong.
Katto katne ki mat kiba kongsan km ka jingbthah ki long, ia ki kot thep kyrteng yn sdang ban ai naduh ka 14 tarik u Iaiong haduh ka 20 tarik u Iaiong, 2023naduh ka por 11 bajemynstep haduh 5 bajejanmied na ka Ophis trei kam ka KSU.
Ia ki kot thep kyrteng dei ban pynpoi sha ophis ka seng kan long naduh ka 15 tarik u Iaiong haduh ka 20 tarik u Iaiong, 2023 haduh ka por 5 baje janmied bad ka Jingwengkyrteng lada don kan long ha ka 21 tarik u Iaiong haduh ka por 5 baje janmied.
Ka jingbishar ia ki kot thep kyrteng kan long ha ka 22 tarik u Iaiong, 2023 ha kapor1bajenoh phai sngi. Ia ki kot thep kyrteng dei ban pynpoi ha lane shwa jong katei ka tarik ba la kdewhaneng ha u Chairman lane Secretary ka Election Committee.
Ka Election Committee ka bthah ia baroh ki Unit, Circle, Area Unit, Division bad District Unit ban pynpoi ia ki kyrteng jong ki nongjied kaba long 10 ngut na kawei kawei ka unit hapoh ka 25 tarik u Iaiong, 2023 ha Ophis trei kam jong ka Seng ha Jaiaw.
Ki post ki ban pyniakhun ki long President, Vice-President, General Secretary, Assistant General Secretary, Education Secretary, Organising Secretary, Information bad Publicity Secretary, Office Secretary, Sports bad Cultural Secretary bad Environment Secretary.
Ia ka result yn pynbna ha kane ka juh hi ka sngi, Ka Committee ka sngewbha ruh ban pyntipba ka la jied ia ki katto katne ki riew rangbah ki nonghikai bad kumjuh ruh na kaliang ki lad pathaikhubor ban long kum ki nongpeitpyrman ia ka jingiaid beit iaid ryntih jong kane ka ilekshon, kane ka long katkum ka kyrwoh kaba la phah da u bah Danny M Khyriam shongknor bad u bah Samuel B. Jyrwa Secretary ka Election Committee ka KSU.
