Shillong, Nailar 25: Ha dien ba ka HYC ka la pynlong ia ka jingialang pyrshah MoU ha sor Nongstoin ki la don ki kynhun sain hima bad ki nongbud Jong kine ki party kiba la kren ba na ka Liang ka HYC ka pyrshang ialam bakla ia ki paidbah halor ka MoU ia pynbeit pud ha pdeng ka Meghalaya and Assam .
Kine ki Seng sainpyrthei bad ki Nongkyrshan ki la kren Shane shatai ba kata ka MoU ka long kaba dei bad kaba bha Shaba palat bad ki la kop ruh ba dei tang ka Party Jong ki kaba nud ban ia pynbeit ia u pud bad ka Assam.
Ka HYC ka kwah ban kren Shai ba kam shym la ialam bakla ia ki paidbah lane kam shym la pynthud ia ka jingthmu ka Sorkar Meghalaya ban ia pynbeit ia u pud u Sam hapdeng ka Meghalaya bad Assam.
Ka HYC ka kwah ban Ong ba kum ka Seng ngim don hok ban ialam bakla ia ki paidbah bad ha ka juh ka por ki Minister lane ki MLA ruh kim don hok ban pynksan jubor ia ka bym dei. Khnang ba kan long kaba Shai bad ka bymdon Jingnoh shiliang ka Seng ka kloi ban ia tai haba shit haba shai ka sngi halor kane ka MoU.
Ka HYC ka dei ka Seng kaba burom ia ki paidbah bad ia ka sur Jong u paidbah te kan pynlong da ka jingiakop pynshai paidbah lane ka Jingiatai nia paidbah halor ka MoU ia pynbeit pud hapdeng ka Meghalaya bad Assam.
Ka Seng kan sa buh ki nongkren ban kren pyrshah ia ka MoU bad ki kyntu ia u Chief Minister , ki Minister bad ia kito kiba soi ne kyrshan ia ka MoU ba kin wan ban pynshai lane pynksan ia ka MoU kaba ki la dep soi .
Ka Seng ka kwah ban kren Shai ba ngim kwah ban ia tai nia bad ki briew ki bym don bynta ha ka jingsoi ia ka MoU lane ki bym don bynta ha ka jingiakren pynbeit pud bad ka Assam.
Kumta, kim pdiang tang ia u Chief Minister lane ki minister lane ia ki MLA ba kin wan mih khmat ban kyrshan ia ka MoU Lada don . Yn buh mar lai ngut ki nongkren kata lai ngut kiban kren kyrshan ia ka MoU bad lai ngut kiban pyrshah bad yn ai por mar 15 minute uwei u nongkren.
Ia ka Jingiatai nia kaba nyngkong halor ka MoU yn pynlong ha Patharkhmah , Ribhoi District ha ka 30.8.2022 ha ka por 12 pm bad yn sa buh sngi ruh ha shillong bad ha ki wei ki jaka kum ha Rambrai , Riangdo bad ki wei .
Lada Jia ba na ka liang jong u Chief Minister lane ki Minister ne ki MLA kiba soi lane Rai ban soi ia ka MoU Kim wan ban ia shim bynta, ka Seng kan pynlong Kan iaid shakhmat ban pynlong la ka Jong ka program ban pynshai paidbah bad pyrshah halor katei ka MoU kaba long pyrshah ia ki hima khasi, ong u bah Roy Kupar Synrem general secretary HYC.
