Shillong, Jylliew 25: U Chief Executive member jong ka KHADC u bah Titosstarwell Chyne mynta ka sngi u la iathuh hapoh ka iing dorbar ba na ka liang jong ka District kala sngewkhia bha halor ka jingeh jong ki nongrep ba ki ia kynduh ha kane ka jingialeh pyrshah ia u COVID-19.
U la iathuh hapoh ka iing dorbar ba mar ia shimti kum u CEM jong ka KHADC u la khot ia ka jingialang ia ki nongthied jhur ha Iewduh bad la leit ban ia kynduh ia ka sorkar ban kyntu ia ka sorkar ba kan plie noh ia ka iew jhur ban dielang ha Iewduh, hynrei namar ba ka khapngiah palat ka sorkar kala ai jaka ha Parking Lot ha Anjalee.
Ka sorkar kala khot ruh ia ka jingialang bad ki CEM jong ki District Council ha kaba ka sorkar kala pynsngew ba ka don ka jingthmu ban tei shuh shuh ia kai iew dielang jong ka sorkar ban iarap ia ki nongrep. Haba ia dei bad ka ain jong ka KHADC ba ia dei bad ki iew ka EC kan sa wan ia ka jingpynkylla ia ka ain kaba ki don mynta ban pynbha shuh shuh.
U CEM jong ka KHADC u la jubab ba ka KHADC kan lah ban buh dor ia ki marrep namar kane ka dei ka bynta jong ka sorkar jylla kaei kaba ka KHADC ka lah ban leh ka long tang ba kan lum ia ka Musur na kiew. Kane ka dei ka jingjubab bynrap jong u CEM halor ka jingkylli u bah Charles Marngar la ka District Council ka lah ne em ban buh dor ia ki marrep.
Halor katei ka jingkylli na ka liang jong ka EM ba dei peit ia ki kam Iew ka kong Grace Mary Kharpulit, ruh kala ong ba ka KHADC kam lah ban buh dor ia ki marrep namar kane ka dei ka kam jong ka sorkar jylla, katba ka KHADC ka ai tang ia ka jingbit ban plie iaki Iew.
U Bah RV Lyngdoh, u la ai jingmut sha ka Executive Committee ba la dei ban pynkylla noh ia ka ain ha kaba ia dei bad ki Iew ki hat bad na ka liang jong ki liang pyrshah ruh ki kloi ban ia treilang ha kane ka bynta na ka bynta ka jingmyntoi jong ki nongrep ha ka jylla.
