Shillong, Nohprah 18: Mynta ka sngi la plie ia ka surok kaba la shna na Lower Lumparing sha Laban kaba jrong 410 metter la plie mynta ka sngi da u bah Sanbor Shullai MLA bad ia kane ka surok la ai kyrteng Sanbor Shullai Road.
Haba kren ha ka jingialang paidbah na ka liang jong u bah Sanbor u la ong ba kane ka jingai kyrteng kam dei ka jingkwah ka jong u hynrei ka dei ka rai jong ka executive Dorbar jong ka shnong Lumparing ha ka jingialang kaba la long katba ki dang ia wat lad kumno ban ioh ia kane ka surok.
Ha ka jingialang jong ka Executive Dorbar ba kila shim ia ka rai ha u snem 2008, ha kaba ka dorbar shnong kala ong ba lada u bah Sanbor u lah ban pynioh ia kane ka surok, ia ka kyrteng jong ka surok yn ai nam ha ka kyrteng jong u, kane ka dei ka jingthoh hapoh ka dorbar shnong Lumparing.
Kum u MLA u ba dang shu jop nyngkong ha katei ka por u la trei shitom bad dei ha u snem 2014 ba la ioh ia ka pisa kaba T.3.92 klur tyngka bad la buh mawnongrim bad mynta ka sngi la lah ban plie ia kane ka surok kaba ki paidbah ki la angnud mynta la palat 40 snem.
Ha ka jingkren u bah Sanbor u la ong um lah khlem da ai khublei ia u Myntri Rangbah barim ka jylla u Dr Mukul Sangma namar dei ha ka por jong u ba la lah ban ioh ia kane ka jingmang pisa, u ai khublei kyrang ia ka kynhun niam muslim, ka seng Khasi bad ia ki trai jaka ba kila ai ia ki jaka jong ki ban shna ia ka surok.
Ha ka jingkren jong u rangbah shnong ka Upper Lumparing, u la iathuh ba ka jingkwah jong ka shnong ban ioh ia kane ka surok kala dei naduh ki snem 1978 bad ka jingiapyrshang ban ioh ia kane ka surok kala long bad shibun ki MLA kiba la leit noh bad haba u bah Sanbor Shullai u la jop ha u snem 2008 kila ia kynduh ia u ban ia kren ia kane ka surok.
Ia ka jingduwai phirat shuwa ban plie ia kane ka surok la pyndep da u bah Skor Jala na ka seng khasi, kiwei kiba la kren ki long u bah Arnold Marwein President seng khasi raid Laban, bah Blu Khongsit, bah Moon Shangpliang jong ka Muslim Kabrastan Committee, u Executive Engineer bad kiwei kiwei, ia ka jingialang la pyniaid da u rangbah shnong Lower Lumparing u bah D Shabong.
