Shillong, Naitung 10: Ka jingaipor jong u Deputy Commissioner ka East Khasi Hills District ia ki dukan kiba la shna beain ha lynti iaid naduh Laimer shaduh Hynniewmer kala kut bad mynta, ka shong ha ka National Highway Infrastructure Development Corporation Limited bad kum juh ka PWD kan pyntreikam ia ka hukum.
U Deputy Commissioner ka East Khasi Hills District la pynmih ia kane ka hukum ha ka 30/Jylliew/2026 bad la ai por khatsan sngi ia kiba la shna dukan ha lynti iaid ba kin pynpra noh hapoh ka 15 sngi naduh ba pynmih ia katei ka jingpynbna kaba mut ka hukum ka kut ha ka 15/Naitung/2026 ia kaba ym pat pynpra haduh ba thoh ia kane ka ka khubor.
U DC u la pyntreikam ia kane ka hukum ka long katkum ka rai ka iingbishar kaba ha khliehduh jong ka Ri India, katkum ka mukotduma ka Sou Moto Writ Petition (Civil) No. 9 of 2025 kaba iadei bad ka jingshngain jong ka Ri India kala khang iaki jingshna bad jingtei ia kino kino ki jaka bam bad ki jaka die jingbam, lane kiwei pat ki jingtei kamai kajih hapoh ki jaka iaid lynti ha surok bah.
Te kumta, la bthah ia baroh ki dukan kiba la buh ha lynti iaid ha ka surok bah naduh 3 mer haduh 7 mer, Upper Shillong ba kin kynriah hapoh ka 15 sngi naduh ka sngi ba la pynmih ia kane ka hukum ha ki kot khubor.
Lada ki dukan kim kynriah hapoh ka por kaba la buh, kumta la ia bor ia ka National Highway Infrastructure Development Corporation Limted bad kum juh ia ka PWD ba kin pynpra ia ki jingtei beain kiba la shna ha lynti iaid naduh laimer shaduh hynniewmer.
