Shillong, Iaiong 26: Ka Khasi Students Union (KSU) Jaiaw Circle ryngkat ka jingiatreilang bad ka ophis Ka Khasi Jiantia Presbyterian Synod Sepngi, Urban Mission, kan pynlong ia ka jingiaid paidbah ha ka 28th April 2017, ha ka por 12 baje nohphai sngi, kum ka dak ka jingpyrshah ia ka jing jyllei jong u droks, u ba la par sted bha ban pynjot ia ka jingim ki para samla.
Ha kaba iadei bad kane ka ophis Voluntary Health Association of Meghalaya (VHAM) bad ka State Police department (Narcotic Cell), kin sa wan ban batai bad pynshai sha ki khynnah skul ha kaba iadei bad ki lad ki lynti kumno ban kiar na utei u jait jingdih. Ia katei ka jingiaid yn sdang na phyllaw jong ka Community hall, Jaiaw Lumpyllon ter ter shaduh Motphran bad yn pynkut pat hapoh Madan Student, Jaiaw Pdeng da ka street play na ka liang jong ki khynnah pule ka Martin Luther Christian University, Department of Social Welfare.
Shuh shuh ka seng ka dap da ka jingsngewkhia kaba khraw halor ka jingjot bad jingngop noh jong ki samla ha kiba bun ki jingdih pynbuaid khamtam eh ha u Drok, te kumta ka seng ka khot ka wer ia baroh ki nongshong shnong jong kane ka thain kiba don ka jingsngewkhia bad ka jingkitkhlieh ia ka imlang ka sahlang ha kaba ia dei bad kane ka mat kaba la ktah ia kiba bun ki longiing ba kin wan ban ia snohkti lang khnang ba ngin lah ban rat diengkhong ia ki kam sniew bad ban ioh ia ka lawei kaba suk bakmen bad ba shongshngain ki pateng ban sa wan, ong u samla Alan Laoo nongai khubor ka seng KSU Jaiaw.
