Mawkyrwat, Naitung 19: Ka KSU South West Khasi Hills District ka pyntip paitbah ba kan iaid beit shakhmat halor ka Jingialang paitbah ba la pynbna haka sngipalei 21 tarik ia kaba yn pynlong haka iew Mawkyrwat ban pyrshah jur halor ka Tender Notice jongka Uranium Corporation of India Ltd iakaba la pynmih paitbah haka 02.07.2016 lyngba ki lad pathai khubor bad ka website jongka UCIL.
Kane ka jingialang paitbah la pynlong kum ka jingpyrshah iaka UCIL bad ban dawa naka sorkar ba kadei ban pynshitom ia kane la Company kaba la pyrshang ban thom da ka bor iaki paitbah jong ka South West Khasi Hills District lem bad ka Jaitbynriew hi baroh kawei. Ha katei ka sngi , na ka liang jongka KSU SWKHD kan shim iaka rai ba tyngeh lada ka sorkar hapoh ka jingialam jong u Mukul Sangma kam leh eiei halor kane ka jingleh jongka UCIL.
Ka jingialang ha katei ka sngi yn sdang shwa daka jingia iaid paitbah na lad jong ka Mawkyrwat C&RD Block ha surok marjan ka Sngap Syiem College naduh ka por 10am ( mynstep) shaduh sha poh iew Mawkyrwat kaba dei ka jaka ba yn pynlong iaka jingialang paitbah.
Ka KSU namar kata ka kyrpad ia baroh ba kin iamih ryntih ha katei ka sngi ban ai iaka rai ban pyrshah ia u uranium. Ngi kyrpad ia baroh ki paitbah ka South West Khasi Hills District naduh ki nongshong iew, ki nongwaniew, ki longkmie longkpa, ki nongniah kali kamai, ki khun samla , ki khynnah skul ban ieng tylli kawei bad pyllait por sha kane ka jingialang.
La kyrpad ruh iaki nongniah kali bad ki nongshongiew ba kin sngewbha ban sangeh kamai shipor katba ka jingialang ka dang iaid kum shibynta ban pyrshah jur halor ka jingpyrshang jongka sorkar bad ka UCIL ban thom da ka bor iaki trai ri trai muluk. La kyntu ia kiwei ruh ki sengbhalang napoh jongka district bad iaki paradoh parasnam na kylleng ka bri u Hynniewtrep ban wan ha katei ka sngi kaba dei ka sngi ban shim rai haka por jongka saw ka sian baka jaitbynriew ka mad, la ong u Bah Forwardman Nongrem President jong ka KSU SWKH.
