Shillong, Jylliew 11: U myntri rangbah ka jylla u Conrad K Sangma u la pyntip ba ka sorkar kala shim ia ka rai ban dang bteng ia ka jingkhangdam ha East Khasi HIlls District, katba ha kiwei ki District la shah ban plie ia ki dukan ba don kam haduh 20%.
U myntri rangbah u la ong ba ia ka jingkhangdam ha East Khasi Hills kan dang bteng namar kane ka dei ka District kaba bun eh kiba la test COVID-19 positive, hynrei ia kiwei ki District ha ka jylla la ai ia ka bor ha ki Deputy Commissioner ba kin shim ia ka rai.
Katba dang bteng ia kane ka jingkhangdam ka sorkar kala shim ia ka rai ban shah ia ki dukan ba don kam ba kin plie haduh 20% ki dukan, hynrei ka shong ha ki DC ba kin shim ia ka rai tang ba ka jingplie kan nym palat ia ka 20%. Ki DC ki don ruh ia bor ban nym shah ban plie ia ki dukan lada ka jinglong jingman kam biang.
U Myntri rangbah u la ong ruh ba la shah ia ki kali kamai ba kin sdang kamai kata ka long katkum ki jinglong jingman ha ki District bad kata ruh haduh 20% ki kali kamai ha ki District kane ruh ka shong ha ki DC hyrei kim lah ban palat ia ka 20%. Kiwei kiwei ki jingkhang kin shong ha ki DC.
U Myntri rangbah la ong ba kumba ka paw mynta kito kiba la dep ban ai tika shisien ki don ki wei ki jingshitom ruh hynrei kito kiba la dep ban ai tika ar sien kala iarap shisha kumba ka paw kala don ka jingiada bad kaba sngewtynnad ka long ba ka sorkar India kala shah ai ai tika ia kiba 18 snem shining, u myntri rangbah u kyntu ia ki paidbah ba kin wan sha khmat ban ai Tika ia lade.
La iathuh ba ha kane ka jingialang kaba la long mynta ka sngi ha Jowai, la ia kren ka jinglong jingman kane ka jingpang ha ka jylla baroh kawei, kumba ka paw ka jingdon kiba la test COVID-19 ha ka jylla ka dang don ha ka jingkiew jinghiar, wat la kala don ka jinghiar ha ki katto katne ki District.
U Myntri rangbah u la ong ba ka jingwan sha Jowai ban khot ia kane ka jingialang ka long ba la iohi ha kine kiba pang kala kiew ha kane ka District dei na kane ka daw ba kum ka kynhun myntri la khot ia kane ka jingialang ban ia kren ha jingdon ki DC bad ki SP jong kine ki ar tylli ki Distirct.
