Shillong, Risaw 30: U Bah Paul Lyngdoh EM ba dei peit ia ka khaii pateng jong ka KHADC, u la ong ba ka jignkhynra ia ki nongdie mada kiba khlem don ia ki trading laien kiba hap hapoh jong ka KHADC kang dang iai beteng.
U bah paul haba kren ha ki lad pathai khubor u la krem shai ba ka KHADC ka leh ia kane hapoh ki kyndon jong ka ain ia kaba la tip kum ka “Trading by Non Tribals, Act 1954 and rule 1959”. Ka KHADC kan iaid katkum ka ain dei na katei ka daw ba ka sa pynmih ia ka jingpynbna paidbah shuwa ban leh.
Halor kane ka jingkhynra mynta ka sngi na ka liang jong ka KHADC kala shim ia ka jingiarap jong ka sorkar jylla ba ki pulit kin ia don lang bad ia kane la ia kren bad u myntri ba dei peit ia ka tnad pynroi sor bad kum juh bad ka Superintendent ki pulit jong ka East Khasi Hills.
La iathuh ba mynta ka sngi ka jingkhynra ka la long ha kylleng jong ka sor Shillong bad kala iaid beit khlem don kano kano ka jingwit bad ia kane kin dang beteng ha kine ki sngi ban wan namar ia mynta ka sorkar ka don ha jingduna ia ki pulit namar ki ia pynkhreh na ka bynta ka jingwan jong u President ka Ri India ha ka sngi u Balei.
Haba ia dei bad ka jingia mai kaba la jia mynta ka sngi kam dei halor ka jingkhynra jong ki briew jong ka KHADC hynrei ka dei na ka daw jong ka jingiaknih jaka hapdeng ki nongshong madan.
Na ka liang jong ka KHADC kam shym khyndang ia ki nongshong madan, ia kane ka KHADC kan nym lah hi ruh ban leh namar kane ka hap hapoh jong ka sorkar jylla katkum ka ain kaba ka sorkar ka don.
