Ka jingkyrmen ka la wan mynta halor ka jingdawa ban pyntreikam ia ka ILP: HS Shylla

Shillong, Rymphang 08: Ka jingkyrmen ka la wan mynta halor ka jingdawa ban pyntreikam ia ka ILP ha ka Jylla jong ngi, kata, haba kawei na ki kynhun dawa ILP, kata, ka Confederation of Meghalaya Social Organisation (CoMSO) ka la pynmih da ka jingthoh halor ka jingdawa ia ka ILP ha ka 7 tarik February, 2020 bad sam sha ki paidbah ia kane ka jingthoh (leaflet) bad la shon ruh ha ki kotkhubor ha ka 8 tarik February, 2020.

Ka jingthoh kaba kum kane ka long kaba donkam eh na ka bynta ba ki paidbah kin ioh tip kham bniah kaei ka ILP. Kaba nga da kmen ka dei ia kane ka bynta ba la thoh ha ka paragraph ka ba lai –Quote “Ka dei ka jingshisha ba ka Khasi bad Jaintia Hill, ka Bengal EasternFrontier Regulatiom, 1873 ka dang im haduh mynta bad donkam tang ia ka Notification na u Governor ban pyntreikam ia ka, namar la pdiang (Adopt) ia ka lyngba ka United Khasi Jaintia Hills District (Adoption of  Laws) Regulation, 1952, lyngba ka Section 79 jong ka North Eastern Reorganisation Act, 1971.

Kumjuh ruh lyngba ka Meghalaya Adoption of  Law Order 1974. Katba ia ka Garo Hills la weng noh na ka Bengal Eastern Frontier Regulation 1873 bad yn hap ban ioh ia ka jingsoi na u President ka Ri ban ioh pyntreikam biang ia ka ha ri lum Garo. Namarkata, na ka bynta ban ioh pyntreikam ia ka ILP ha baroh kawei ka  Jylla Meghalaya, donkam ban ioh ia ka jingsoi jong u President ka Ri India.”  Unquote

Ka jingtip ka long ka bor, ka jingiatylli khlem ka jingtip kam don jingmut, namarkata, nga kyntu tyngeh nyngkong ia ki Minister Badonburom jong ngi, ki MP, ki MLA, ki MDC, ki Khlieh Nongsynshar ha ki Hima bad Elaka bad ki Raid ki Shnong, ki Seng Bhalang baroh ban pdiang ia katei ka jingshisha ba na ka bynta ki jaka kiba hapoh ka KHADC bad JHADC ka ILP ka la don lypa, kata, ba ka Bengal Eastern Frontier Regulation 1873 (BEFR 1873) ka la shah kynthup ha ka United Khasi Jaintia Hills District (Adoption of  Laws) Regulation, 1952 ba la thaw katkum ka Paragraph 19 (1) (b) da u Governor bad mynjur da u President ka Ri India ha ka 3.5.1952 bad ba la pynskhem ruh da ka Rai jong ka Supreme Court badonburom ha ka 23.11.1971.

Kumta, kaba sah hi ka long ia u Governor ka Jylla Meghalaya katkum ka Section 2 jong ka United Khasi Jaintia Hills District (Adoption /Application of  Laws) Regulation, 1952 ba la khot lyngkot ka Regulation No. 5 of 1952 ban pynbna ba la pynjari ne pyntreikam ia ka ILP (EBFR 1873) ha baroh ki jaka jong ka KHADC bad JHADC. Lada ka Sorkar Jylla ka la lah ban pynbor ia u Governor ban pynjari ia ka Administrator Rule ha KHADC wat khlem ka nongrim kaba biang, kan eh aiu ba kan bthah ia u Governor ban pynmih ia ka Notification katkum ka Section 2 jong ka Regulation No. 5 of 1952 ban pyntreikam ne pynjari ia ka ILP.

U bah Shylla u ong ba u da kwah eh shisha ban pyntreikam ha baroh kawei ka Jylla, hynrei kane ka kam ym long ban pynslem namar ka jingwan rung ki bar-jylla bad kiwei kiwei sha ki shnong jong ngi ka long kaba jur katta katta kumba ngi la iohi ba la kem ia ki da ki Seng Bhalang man ka por. Nalor ba ka New Delhi ka don la ki jong ki daw ban pynslem ia ka ILP.

Hynrei da kaba nang pyntreikam ha ki ar tylli ki District Council (KHADC bad JHADC) ia kawei kaba dang sah namarba la don ka jingwit naduh mynshwa (Repealing Act 1897) ai kan nang wan nadien, bad yn ym lah shuh ban pynduh ia ka (GHADC) lada ka KHADC bad JHADC ka la ioh. Ba ka KHADC bad JHADC kin duh ia ka hok kaba ki la ioh naduh ka 1952 namar ka GHADC ka long ka bym lah ban pdiang.

La dei ban iada da ka lynti ba ka GHADC ruh kan sa ioh ia la ka bynta lada ka KHADC bad JHADC ka la ioh ia ka bynta katkum ba la mynjur da u President banyngkong ka Ri India, u Rajendra Prasad ha ka 3 tarik May, 1952 ka ban long ruh ka jingsah jingkynmaw ia ka jingpynrung ia ngi baroh (25 tylli ki Khasi States bad ka Khasi and Jaintia District) hapoh ka United Khasi-Jaintia Hills Autonomous District Council ha ka snem 1952.

Ka dei ba ka CoMSO ka ong ba hap ioh ILP ia ka Jylla baroh kawei, hynrei kan kham sting ia ka Sorkar Jylla bad kan long ruh ka jingleh hok ia ka KHADC bad JHADC bad da kata kan long ruh ka lynti ia ka GHADC namar kumno  yn pynduh ia ka marwei haba ar tylli ki la ioh. Ka Sorkar Meghalaya bad ka Sorkar India kan ioh ia kawei pat ka Jylla kaba shong suk lada ia ka Article 19 (5) bad Article 29 ka Constitution ka India la pynioh pura ha ngi, kata, ba ngim don daw shuh ban tieng ia ka jingshah tyllep ha ki heh-paid.

Kumta, haba ka CAA 2019 ka da kdew ba ka Meghalaya ka don ia ka Sixth Schedule, kumta ruh, burom ia ka Paragraph 19 (1) (b) jong ka Sixth Schedule kaba la sei tang kawei ka Ain (Regulation No.5 of1952) bad kut noh,  ba kan sah ka nam bad ka burom jong u Governor ka Jylla Assam bad u President ka Ri India kiba la thaw shitom bad kyrkieh kyrkieh (22-4-1952 to 3-5-1952) ia ka Regulation No. 5 of 1952.

Kumta, ym long ban ia nujor ia ka Sixth Schedule bad ka Article 371 A lane 371 G, kata, ba ka bha bad myntoi shibun shah ka Sixth Schedule ban ia ka Article 371 (A & G) khamtam na ka bynta ka Jaidbynriew Hynniewtrep jong ngi kaba ngi da khein kor eh ia ka jinglong bakyrpang eh jong ngi kum ka Jaidbynriew Tip Kur Tip Kha kaba da pyniapher shisha ia ngi na kiwei pat ki jaidbynriew baroh ha sla jong ka khyndew.

 

What Next?

Recent Articles

Leave a Reply

Submit Comment

*

Where to buy Vidalista Professional 20 Mg (Tadalafil) tablet