Shillong,Lber 24: Mynta ka sngi u Bah Pynshngaiñ N Syiem Chief Executive Member (CEM) barim jong ka Khasi Hills Autonomous District Council (KHADC) u la ai ka jingpynshai halor ka jingmih khubor ba paw ka jingbamsap ba shyrkhei ka KHUDA na ka Monolith Festival ha Mawphlang bad u la kyntaid mardor ia ka tei ka jingong bad u la ong ba kam shym la don satia kaba kum kata.
Halor ka jingmih kane khubor, u Bah Syiem haba ia kren bad ki nongthoh khubor mynta ka sngi u la ong, ka jingmih ka tei ka khubor ka long ka kaba bakla, kumba ka mih haka kot khubor ka long ba T.6.38 klur ka pisa la dep ban buh na ka bynta katei ka projek hynrei kane ka long tang ka jingthmu ban ialam bakla ia ki paidbah.
U bah syiem u la ong ruh “Nga dap da ka jingsngew lyngngoh kaba halor katei ka jingmih khubor ka bym shisha bad nga pynshai ba ka pisa kaba la bhah bad mang na ka bynta katei ka projek lyngba ka 13th Finance Commission ka long T.5.97
“Ngi la dep ban kren shai lypa naduh kaba sdang ba ia ka pisa baroh yn siew dep tang ynda la sngewhun ia ka kam baroh kaba ki la trei,” la ong u Bah Syiem bad ong ruh ba la dep ban iathuh lypa sha katei ka Anderson Structural Consultant ba ka dor kaba ki la buh na ka bynta kino kino ki bynta jong katei ka projek kin long beit thik katkum jong ka Meghalaya PWD (Building) Schedule of Rate 2010-11.
Utei u CEM barim ka KHADC u la pynpaw ruh ia ka jinglyngngoh ha kaba iadei bad ka jingmih khubor ba la pynlut ban shna ia ka surok ha katei ka jaka haduh T.1.24 klur, ha kaba u la pynshai ba wat haduh mynta ym pat sdang satia ia ka jingtrei jong ka surok hapoh katei ka Heritage Village ha Mawphlang, te kumno yn siew ia ka pisa lada ia ka kam ym pat sdang.
Kum ban shu pyn pynkynmaw ka Anderson Consultation ka la dep ban buh ka jingtyrwa ia ka pisa kyllum haduh T.17.33 lak na ka bynta ban tei ia ki ar tylli ki jaka leit shabar katba la buh bad mang ia ka pisa kumba T.14.52 lak na ka bynta ban tei ia ka septic tank.
“Ka Council kan nym siew dep ia ka pisa baroh ia kaba la buh bad tyrwa na ka bynta ki ar tylli ki jaka leit shabar, lada ka jingtrei kaba la dep ban pyntrei kam long kaba biang bad paka,” la ong u Bah Syiem.
Une u CEM barim ka KHADC u la pynshai ruh ba ka Council haduh mynta kam pat don a ia ki tiar tynrai watla la dep bad mang ia ka pisa kaba kumba T.30 lak ha kaba iadei bad kane ka bynta. “Namar ka jingbym pat thied ia kitei ki tiar tynrai, na ka liang ka Council ka la shu wai noh ia kitei ki tiar ban pyni nam ha ka Monolith Festival kaba la long ar sngi ia kaba la dep ban pynlong ha u bnai Risaw ha u ne u snem ba la dep. Ngi la pynlut T.1 lak ha kaba iadei bad kane,” ong u Bah Syiem.
Watla ka jingmih jong katei ka khubor kam long kaba shisha hynrei pynban kaba ialam bakla ia ki paidbah, hynrei na ka liang u Bah Pynshngain Syiem u la ong ba u kloi ban pdiang ia kino kino ki jingtohkit laitluid halor katei ka kam.(SP News)
