Shillong , Iaiong 27: Ka myntri ba dei peit ia ka Tnat ka koit ka khiah jong ka sorkar jylla ka kong M.Ampareen Lyngdoh haba ai jingkren kum ka kongsan ha ka sngi ba la tip kyrpang kum ka world malaria day, ka la ong ba ka jingpang malaria ha ka jylla ka la hiar bad kam da don than shuh ka jingiap jong ki briew na katei ka jingpang.
Ka Myntri ka iathuh ba ka jingpang malaria kum ba long mynta hi, la lah ban iada, namar ba ka jingduh noh jong ki briew na katei ka jingpang ka long tang kumba 8 ngut bad na ka liang jong ka Tnat hi ka kwah ban pynduh noh syndon ruh ia kane ka jingpang.ka long kaba donkam bha ban rat dyngkhong ia katei ka jingpang ka long ban iatreilang hapdeng ki paidbah, ki Tnat sorkar kum ka Tnat PWD, ka Tnat Fisheries bad kiwei pat ki Tnad.
Ka Myntri ka la ong ruh ba ki lad ki lynti ban iakhun pyrshah ia ka jingpang malaria ka long lyngba ki jingpynsngew thuh paidbah, lyngba ki jingrwai bad kiwei pat ki lad ki lynti ban pynsngewthuh ia ki paidbah nong shong shnong.
Ka Myntri jong ka Tnat ka koit ka khiah ka la ai khublei ruh ia ka Tnat jong ka National health mission, ka District Malaria ka East Khasi Hills District, kumjuh kiwei pat kiba la ia don bynta lang ban iashimbynta ha kane ka jingrakhe ia ka World Malaria Day Ka jylla.
