Shillong, Iaiong 19: U Chief Electoral Officer ka jylla u Dr. BDR Tiwari ha dien ba la dep ban khang ia ka jingthep ha dien bala kut ka por, haduh ka por 6 baje jan miet, ka jingpoi ki nongthep vote katba la ioh jingkhein ka long 69.91%.
Haba kren ha ki lat pathai khubor la iathuh ba ka jingthep vote ha 1-Shillong (ST) Parliamentary Konstitwensi ka long 70.26%, ka 2-Tura (ST) Parliamentary konstitwensi ka long 69.31%, la ong ba kane ka jingkhien kan dang lah ban kiew.
La iathuh ba ia ka jigkhein kaba bniah yn sa ioh mynta ka miet, la ong ba ym pat ioh lut ia ka jingkhein namar ba haduh ba kut ka por thep vote ruh ki dang don ki jaka ba dang thep vote namar ki briew ki la don lypa ha u lain kiba hap hapoh jong ka 1-Shillong (ST) Parliamentary Konstitwensi.
Haba phai sha ka 2-Tura (ST) Parliamentary Konstitwensi la ong ba kala don ka jingthud ha ka network bad khmih lynti ba ynda kila poi sha ki jaka ba biang ka Network ka jingkhein kan sa kiew la khmih lynti ba kan long kumta ynda la ioh lut ia ka jingkhein.
Haba ia dei bad ki jaka buh ia ki ia ki mashin thep vote, na ka bynta ka 1-Shillong (ST) Parliamtnary Konstitwensi ki don 8 jaka hynniew tylli ha ki District bad kawei ha Sohra Civil Sub Division, katba ka 2-Tura (ST) Parliamentary Konstitwensi ki don san tylli ha ki san tylli ki District.
