Shillong, Nohprah 14: U Secretary jong ka District Council Affair jong ka sorkar jylla u Bah Taining Dkhar u la ong ba ha dien ba la ioh pura ia baroh ki jingkhein na kane ka jingiathep vote ban jied ia ki MDC ha kane ka election MDC Shiteng samoi u la ong ba hapoh jong ka KHADC ka long 75.02pc bad hapoh jong ka JHADC ka long 87.51pc.
Haba ia dei bad ka 1-War East MDC Constituency kaba hap hapoh jong ka JHADC la ong ba ka don tang kawei bad ki nongthep vote baroh ki don 6773 ngut bad kiba la wan ban thep ia ka vote jong ki ka long 5927 ngut bad haba shim ha ka percentage kala kot sha ka 87.51 percent. Ka jingniew ia ka vote kan long ha ka 16 tarik ha Amlarem Civil Sub Division.
Katba ha KHADC baroh ki Constituency ki don hynriew tylli, ka jingpoi ki nongthep vote ka long 75.02 pc , ka jingniew vote kan long ha ka juh ka sngi 16 tarik ha kaba ia ki lai tylli ki Constituency kiba hap hapoh jong ka East Khasi Hills District yn niew ha JN Stadium, ki ar tylli kiba hap hapoh jong ka Mairang Civil Sub Division ka Mairang – Nongkhlaw bad ka Pariong –Mawthad Raishan yn niew ha Mairang bad ia ka Rambrai-Jyrngam pat yn niew ha Tyrsem Hall ha Nongstoin.
Ka jingpoi jong ki nongthep vote hapoh jong ka 8-Nongkrem MDC Konstitwensi na ka 20117 ngut kiba poi thep vote ki long 15069 ngut bad ha ka percentage ka long 74.91pc, ka 15-Laban- Mawpren MDC constituency ka jingdon jong ki nongthep vote ka long 11553 ngut kiba la poi sha ka jingthep vote ki long 7424 ngut bad ha ka percentage ka long 64.26pc, katba ka 22-Nongspung –Sohiong MDC constituency ka jingdon jong ki nongthep vote ki long 24,255 ngut kiba la poi wan thep vote ki long 19538 ngut bad ha ka percentage ka long 80.55pc.
Ki Constituency hapoh jong ka West Khasi Hills District ki don lai tylli ka 23-Mairang-Nongkhlaw ki nongthep vote ki don haduh 34051 ngut bad kiba la wan ban thep vote ki long 26668 ngut bad ha kaba khein ha ka percentage kala poi sha ka 78.32pc, katba ka Pariong-Mawthadraishan MDC Constituency ka jingdon jong ki nongthep vote ka long 32230 ngut bad kiba la wan ban thep vote ka la poi sha ka 24116 ngut bad ha ka percentage kala kot sha ka 74.82pc. Ka 28 – Rambrai Jyrngam ka jingdon jong ki nongthep vote ka long 24,596 ngut bad kiba la poi thep vote pat ki long 17364 ngut bad ka percentage kala kot sha ka 70.60pc.
