Shillong, Naitung 19: U Bah PN Syiem Chief Executive Member (CEM) jong ka KHADC u la ong ia ki dkhot jong ka KHNAM kiba la leit ban ia kynduh ia u mynta ka sngi ba kane ka jingthung ia u Bah Welljune Syiemlieh kum u Principal Secretary hapoh ka Council ka long baka Council ka don kam ia ka jingdon jong u ban dang trei namar kiba bun ki kam kiba dang sahteng.
Na ka liang jong u CEM u la kren shai sha kine ki nongialam jong ka KHNAM ka long ba kane ka jingthung kan long tang katto katne por haduh ban pyndep ia ki kam ki ba sah kum ka jingiadei bad ka MUDA.
U Bah Thomas Passah president jong ka KHNAM Youth Wing haba kren ha ki nongthoh khubor, u la ong ba kane ka jingthung ia u ne u ophisar kadei tang ban pynsepei kai ia ka pisa jong u paidbah namar ba u CEM u la ong ba kan long tang katto kattne por kum ka seng kan dang iai but dien ia kane kakam.
