Shillong, Kyllalyngkot 19: U myntri rangbah ka jylla u Dr Mukul Sangma u la ong ba u sngew kmen ban iohi ba ka jylla ka don ia ki seng bhalang kiba peitngor ia ka imlang sahlang bad u kyrmen kiwei ki jylla ruh kin don lang kumba don ka jylla Meghalaya.
Ia kane u la kren ha dien ba la wai ka jingialang jong ka cabinet haba ki nongthoh khubor kila buh ki jingkylli ha kaba ia dei bad ki kam leh beijot ia ki kynthei khynnah kaba la kiew rasong ha kane ka jylla Meghalaya ha kine ki sngi.
U Dr Mukul u la ong ba ka ain kan sa leh ia kaba don kam, u la ong ba ha ka synshar paidbah ki don lai tylli ki bynta kiba don ia la ka jong ka jong ka bor, ka iing dorbar thawain, ka sorkar bad ka iing bihsar kaba kine lai ki trei hala ka jong ka kam kaba ym lah ban tuklar kawei ia kawei pat.
Haba ia dei bad kine ki kam sniew, ki kam leh beijot bad ia ki kam sniew kiba bun jaid, ka sorkar kala lah ban pyniakhlad ia ka rukom trei kam na ka sorkar ne kata ka “Executive” bad ka iing bishar ne kata ka “Judiciary” bad kane baroh ka long ban pynsted ia ki kam bishar, khamtam eh ha kaba ia dei bad ki kam leh beijot ia ki kynthei khynnah.
Na ka liang jong ka sorkar ka ai ka jingiaroh ia ki pulit jong ka jylla kiba la trei shisha ia la ka jong ka kam ban kem ia ki nongleh kam sniew bad pyngnat ia ki ha ki kyndon bapher bapher katkum ka jingdawa jong ka kam kaba ki nongleh kam sniew ki leh, hynrei ban pynrem ne ban pynksan ia no iano ka dei ka kam jong ka iing bishar kaba ka sorkar kam lah ban tuklar.
Na ka liang jong ka sorkar ka don ia ka thong ban tehlakam ia baroh ki kam sniew kiba wan hapoh ka jylla bad ka jingbuh ia shibun ki police station ha ki jaka bapher bapher jong ka jylla ka long ban pynsngew ha ki paidbah ba ki dei ban don ka jingtieng ia ka ain bad ki dei ban burom ia ka ain, kaba kongsan ka long ba ki briew ki dei ban burom ia ka ain, la ong u myntri rangbah ka jylla u Dr Mukul Sangma.
