Pyndeng Umjarain June 21: Ka seng ki Trai Khyndew Warsan Lyngdoh Area ka don hapdeng ka jinglyngngoh kaba khraw ia ka jingpynslem jong ka Khasi Hills Autonomous District Council (KHADC) ban ai NOC ia ka surok 2-Lanes Nongstoin –Wahkaji –Mawthabah bad ka surok Wahkaji – Phlangdiloin – Ranikor bad kiwei kiwei kiba hap hapoh ka jingpeit jong ka.
Ka seng ka kyntu jur ia ka KHADC ban ai noh kloi ia ka NOC khnang ba ngi ki paidbah nongshong shnong jong ka thain bad area Warsan Lyngdoh ngin ioh mad noh ia ka suk ha ka leit ka wan bad ka ioh ka kot kumba long lem kiwei ki para nongshong shnong, bad ngi da kyrpad tyngeh ia u CEM ba don burom ban nym pynslem shuh bad dei ban ai noh ha kine hi ki sngi, namar la sngewthuh shai lada dang pynslem ia ka jingai NOC, ia baroh ki Project 2-Lanes na Meghalaya yn rah sha kiwei pat ki jylla jong ka Thain Shatei Lammihngi jong kaRi India.
Lada jia shisha ha ba kum kata ka apot mano ki ban kitkhlieh ia ka jingjynjar bad kordit sat jongka thain jong ngi baroh kawei. Haba bun ki longkmie ki la shu duh ei ia la ka jingim ha shiteng lynti haba ioh khun lung bad kiwei kiwei ki jingpang kiba la jur haba ngim don ka surok kaba biang.
Ki soh ki pai, ki kwai ki tympew, U Sying u soh mrit bad kiwei kiwei ki mar rep jong ngi ki la shu pyut namar ngim don ka surok kumba long lem kiwei. Ka thain Warsan Lyngdoh bad ki area ba marjan ki long ki jaka kiba khlain bha haba pynmih ia ki mar rep, hynrei ngi shu im sah ha ka jingkyrduh namar ngim don ka surok. Lada kane ka surok kan duhnoh ka seng kam banse ban shim ia ka rai ban leit shah thngan khlembuh por hapoh KHADC. Namar ngi sngewthuh shai ba ka jinglong tynrai jong ki khyndew jong ngi kam don jingmut haba ki khun ki hajar, ki trai jaka trai muluk kiba la buh hok da ki Koh ki Iaw Tymmen pateng la pateng hangi ki shu shah khang khyrdep noh ha ki bor synshar jong ka nongpeit nongjngoh lem ia ngi.
Kum ka seng ngi don ruh ka jingkyrpad ia ki bor ba dei peit ia ka jingshna surok ban phai khmat lem ia ka dong Warsan Lyngdoh jong ngi kaba haduh mynta ngim pat don ka surok kaba na Wahkaji sha Ummer –Nongrynniang kiba don 19 tylli ki shnong kaba jngai tang kumba 20km. Shen ha kine ki sngi ka seng kan sa phah ia ki jingdawa sha ki bor ba dei peit ia ka surok.
