Shillong, Jymmang 11: U bah Rangkynsai Kharbuki u Excutive Members (EM) ka tnad Trade ka Khasi Hills Autonomous District Council (KHADC) u la iathuh ba ha kine ki sngi ban sa wan ka district council kan sa phah da ka jingthoh sha u Paul Leong u ba dei u trai jong kawei ka dukan ka ba don ha Iewduh.
Kane ka rai jong ka District Council ka long ha hadien ba u bah Paul Leong u la pynibor ia ki Pulit ka KHADC haka por ba ki mut ban leit kynra iaki dukan ba don hapoh ka Building jong u ha Iewduh ha kine ki sngi ba la dep.
U bah Rangkynsai haba kren bad ki nongthoh khubor ula ong ba dang shen u bah Paul Leong u la dep ban aiti ia ka hukum jong ka courts halor ka jingioh bor jong u ban pyniaid ia ki dukan ha kane ka ka iing ba u long trai.
U la ong shuh shuh, katkum ka hukum ka courts, la ai bor ia u bah Paul ban ai wai dukan ha kane ka iing hynrei la bthah pat ba ka jingaiwai ia ki dukan, kan dei ban iaid beit katkum ki kyndon jong ka KHADC.
U bah Rangkynsai Kharbuki u la ong “U bah Paul Leong u dei u trai jong ka dukan bad u don bor ban ai wai ia ka dukan jong u, hynrei ka dei ban long katkum ki aiñ, ki kyndon jong ka District Council, khamtam lada kiba shong dukan ki dei ki bar jylla, ki dei ruh ban pynbiang ia ki Trading License bad kiwei ki kot ba donkam”
