Shillong, Nailur 28: U bah Paul Lyngdoh mynta ka sngi u la pynip ba ka KHADC kan pyntrei kam noh ia ka ain shna iing ha dien ba kila dep ban ia pynbeit bad ka sorkar jylla, ka tnad pynroi sor.
Haba kren ha ki lat pathai khubor mynta ka sngi la ong ba ia ka ai shna iing yn pyntrei kam ha baroh ki jaka kiba hap hapoh jong ka District Council, lait noh ki jaka sorkar ia kiba la tip kum ka European Wards.
U bah Paul u la kren shai ba ki long iing kiba duk kiba hap hapoh EWS-I bad EWS-II bad ka jaka shna iing kam pat palat ia ka 50 Meter kin nym don kam ban siew ei ei, la ong ba ka jingsiew ban ioh ia ka jingbit shna iing kan kham duna ban ia dor jong ka sorkar.
La pyntip paidbah ba ia ki phom ban pan jingbit ban shna iing yn ioh na ophis jong ka KHADC, ha Shillong, ha Mawkyrwat, Nongstoin bad Nongpoh, la ong ba ka KHADC kan nym pynslem ban ai ia ka jingbit lada ki jingdon kam kiba la buh la lah ban pynbiang da ki nongpan jingbit.
La iathuh ba katba ym pat pyntrei kam iaka ain shna iing jong ka KHADC, na ka liang jong ka KHADC kala dep ban ai jignthoh sha kiba apply ba kin ai sha ki Bank ba ka KHADC kan pyntrei kam ia kane ka ain bad mynta kala pyntrei kam.
Ia mynta ka KHADC kan kham pynleit jingmut ha kaba ia dei bad ki dukan namar ba kiba bun kila leh tam da kaba shna palat ia kaei kaba la buh bad ia ki jaboh la pyntuid sha kiwah. Ka KHADC kala dep thaw ia ka kynhun ba du EM ba dei peit ia ka tnad sha iing un long shongknor bad kin don ki engineer bad ki ophisar.
