Shillong, Jylliew 10: Ka khynnah kaba dang ar snem kaba la shah rahbor na phyllaw jong ka Silchar University ha ka 4 tarik mynta u bnai la ioh ban pynlait da ki pulit jong ka East Jiantia Hills mynta ka sngi na Khliehriat, la ong u superintendent ki pulit u bah Spill Thmar.
Haba kren ha u SP News Agency u Superintendent ki pulit jong ka District u la iathuh ba la ioh ban pynlait ia kane ka khynnah na ka kti jong ki nongrah bor ha ka por 4 baje noh phai sngi mynta ka sngi bad na ka liang jong ki pulit kila pyntip ia kane sha ki pulit jong ka jylla Assam ia kane ka jingioh pynlait.
Kiwei ki lad khubor kiba la lah ban ioh la iathuh ba u wei u ba trei kum u nongkhap snniuh ha kawei ka dukan u la iohi ia ka jingiam lyniar jong kane ka khynnah rit bad ka rukom iam ka la long pher na ka jingiam jong ki khynnah u la ong ruh ia kiwei kiba ia don ha jan ba kin ia peit ia kane ka khynnah haba la iapher ka rukom iam kila pyntip sha ki pulit.
Na ka liang jong ki pulit ruh kila wan bran bran sha ka jaka ba don kane ka khynnah bad kine ki nongrah bor haba kila sngewpher ia ka jingialum briew shuwa ba kin poi ki pulit kila phet krad na katei ka jaka bad kane kala pynlong ba la lah ban ioh ban pynlait ia kane ka khynnah.
Ki thymmei khubor ki iathuh ba ki kmie ki kpa jong kane ka khynnah ki dei kiba hikai hapoh jong ka skul bah Silchar University bad la rah bor ia kane ka khynnah na phyllaw jong katei ka skul bah bad la antad ba kine ki nongrah bor ka long beit ban pan baikliar wait na ki kmie ki kpa jong kane ka khynnah.
