Guwahati, Iaiong 21: Ka Press Information Bureau, Guwahati ka la pynlong ia ka Webinar halor ka “Untold Stories of the Freedom Struggle from North East India”, ka kot ba la thoh da u Nongthoh khubor ba la tbit bha bad u nongthoh kot u Dr.Samudra Gupta Kashyap mynta ka sngi.
Ki nongiashim bynta ha kane ka webinar ki kynthup ia ki nongthoh khubor na kylleng ka thain shateilammihngi. Ia ka webinar la pyniaid da u B. Narayanan, Director General, North East Zone, Tnat Information and Broadcasting, Sorkar India.
Haba ai jingkren pdiang sngewbha u Narayanan u la ong ba ka webinar ka thmu ban iaphylliew jingmut ia ki bynta ba kongsan jong ka kot ba la thoh da u Dr.Samudra Gupta Kashyap.
U la ong ba kane ka kot ba la pynmih da ka Publications Division jong ka Tnat Information and Broadcasting kadei ka jingpyrshang ban pyni ia ki jinglenlade ba khraw jong ki Nongiakhun Jinglaitluid jong ka thain North East.
Ka jingthmu ba kongsan jong kane ka webinar kalong ban pynpoi ia ki khana jong ki riewshlur bym shym la paw pyrthei sha ki paidbah, u la bynrap. Haba kren shaphang kane ka kot u Narayanan u la ong ba kane ka kot kan iarap ia ka pateng ban wan ban tip shaphang ki jingnohsynniang bad ki jinglenlade jong ki Nongiakhunjinglaitluid jong ka thain.
Ha ka jingai jingkren jong u, u Dr.Samudra Gupta Kashyap u la ong ba kane ka kot ka peit bniah ia ki jinglong ba shlur bad ki jinglenlade ki briew na kane ka thain, da kaba wanrah jingshai halor ka jingnohsynniang jong ki sha ka jingiakhunjinglaitluid jong ka ri.
U la ong ba ki khana jong ka jingieidri bad ki jinglenlade jong ki nongiakhunjinglaitluid jong ka thain shateilammihngi ym shym la don jingthoh kiba la pynneh ha ka rukom kaba biang.
Ka jingbym kynthup ia ki khana jong ki jingiakhih pyrshah ia ka jingsynshar ki phareng jong ka thain ha ki kot histori bad ki kot pule ka la ialam sha ka jingngeit ba ka thain shateilammihngi kam shym la don bynta eiei ha ka jingiakhun jinglaitluid, u la bynrap.
U la ong shuh shuh ba ka jingwanrahia ki khana na kylleng ka thain shateilammihngi kalong kaba eh shisha namar ka jingbym don jingthoh ia bun ki jingjia.
U Dr Kashyap u la kren shaphang ki kam jong kine ki riewshlur ba ieid ri kum u ManiramDewan bad KushalKonwar jong ka Assam, RanuwaGohain jong ka Arunachal Pradesh, Tikendrajit jong ka Manipur bad kiwei kiwei.
U la kren sani halor ka khana jong u ManiramDewan, ka jingiakhun jong ka Saraighat, ka jingiakhih ki paidbah ha Phulaguri, ka bynta jong ki longkmie jong ka thain shateilammihngi bad kiwei kiwei ha ka webinar ba mynta ka sngi.
Ha kane ka webinar la iadonlang ruh ki ophisar jong ka Press Information Bureau bad Central Bureau of Communication jong ka thain shateilammihngi.
Ka kot ba la tip kum ka “Untold Stories of the Freedom Struggle from North East India” kadei kaba la pynmih da ka Publications Division jong ka Tnat Information and Broadcasting, kum shi bynta ka ‘Azadi Ka AmritMahotsav’.
Ka kot ka batai shaphang ki khana jong ka jingieidri, ka jingshlur bad ki jinglenlade na kylleng ka thain shateilammihngi bad kumjuh ruh ki jingiakhun bym shym la ioh jingithuh ba ka thain ka la iakhun pyrshah ia ki sahepBilat kiba biang ki tiar ialeh.
