Shillong, Naiwieng 27: Ka kur Warjri kan rakhe lyngkhuh arphewsan snem jong ka Dorbar Seng Kur Warjri ka la sdang naduh ka Dorbar Kur ba la long ha Sohryngkham mynshymsnem bad la pynlong kiwei kiwei ruh ki rong ki taw barabor kum ka jingpyninam ia ki syntiew, ka thohdur, ka thoh essay bad poetry, ka shad ka rwai bad ki rukom lehkai kilan met kum ka Football bad Basketball.
Ka tawkilan Football la pyniaid da u Bah Prosperous Warjri bad Bah Rodson Warjri bad ia ka tawkilan Basketball la pyniaid da I Kong Jeanita Warjri bad u samla Barikupar Warjri.
Baroh la don khatar tylli ki kynhun kynjatbol na ki shnat Upper Shillong, Wahlang, Manai, Pyndemumiong, Thynroit, Mawphlang, Mawkneng, Siejiong, Pommura-Nongkynrih, Mawlai Datbaki, Urur Rangshken, bad Mawprem, ki ba la shim bynta shitrhem ha ka tawkilan ba lai sngi naduh 21tarik Risaw haduh 25tarik Risaw 2023 ha madan Rangshken.
Ha ka tawkilan Basketball pat la don saw kynhun ki shynrang bad kynthei na ki shnat Mawlai-Laitumkhrah, Wahlang, Mawprem bad Upper Shillong. Ki nongjop lahduh ha kine ki tawkilan ki long ka Manai pyrshah ia ka Urur Rangshken ha ka Football bad ha ka Basketball ka nam lahduh ka leit sha ka Mawlai pyrshah ia ka Mawprem na ka liang shynrang bad na ka liang kynthei la jop hi ka Mawlai pyrshah ia ka shnat Wahlang jong ka Seng Kur Warjri.
Nalor ki kynhun nongjop ki ba la ioh ka nam lahduh, yn pynkupnam ruh ia ki samla ba kynsai ha ka jingtbit ba shimet kum u samla Freddy Fender Warjri na Manai u ba la ioh ka nam lahduh Best Goalkeeper, ki ba thep bun tam eh ne Highest Scorer ki long u samla Balajied Warjri na Manai bad Shimbor Warjri na Urur Rangshken ki ba la thep mar saw thong.
U samla Balajied Warjri na Manai u la ioh ka nam kum u riewkilan ba kynsai tam ne Best Player, katba u khynnah samla Micky Berth Warjri na Upper Shillong u la ioh ia ka nam kum u riewtbit ba dang rasong ne Promising Player ha ka Football.
