New Delhi, Lber 03: Ki khraw pyrkhat na America, ka Brookings Institution ka la ong ba ka India ka la lah ban pynduh ia ka jingduktasam, bad lah ban iohi ia kane na ka jingduna haba niew ia ki briew kiba duk bad ruh lyngba ka jingkiew ka jingpyndonkam mar ha ki longiing
Kane ka kaiphod, ba la wanrah da u Surjit Bhalla bad Karan Bhasin, ka ong ba kane ka dei namar ka polisi ba khlain jong ka sorkar ban peit ia ka jingsam biang, kaba la wanrah ia ka roi ka par kaba khlain bad kaba kdup lang ia baroh ha India ha kine ki 10 snem ba la dep.
Ka kaiphod ka ong ba ka jingkiew shaphrang kaba khlain bad ka jing duna bha jong ki jingiapher ki la iatrei lang ban pynduh ia ka jingduk ha India. Ka data ka pyni tang khyndiat ki briew kiba duk ha India haba ianujor bad ki jingantad da ka World Bank.
Ka jingkhien ia ka jingdon kiba duk bad ka bor ban thied ka iapher $ 1.9 na ka kyrdan kala hiar na ka 12.2 % ha u 2011-12 sha ka 2 % ha u 2022-23. Ki nongthoh ki sngew ba ka jingkiew ka jingpyndonkam mar ha ki jaka nongkyndong kam dei kaba lyngngoh namar ka ‘polisi ba khlain na ka bynta ka jingiasam biang lyngba ki prokram bapher bapher ba la bei tyngka da ki paidbah.
Kine ki kynthup ia ka mission ha kylleng ka ri ban tei ia ki painkhana, bad ki sienjam ban pynthikna ka jingioh baroh ia ka bordingelektrik, ka gas bad dang shen, ka um kor, la ong ka Brookings.
Ka jingioh ia ka um kor ha ki jaka nongkyndong jong ka India haduh u August 15, 2019 ka long 16.8% bad kane mynta ka la kiew sha ka 74.7%. Hapoh ka Aspirational District Program, 112 tylli ki distrik ha ka ri ki dei kiba la ithuh kum kiba duna tam ki dak jong ka roi ka par. La phaikhmat sha kine ki distrik lyngba ki polisi Sorkar da kaba peit bniah ban kyntiew ia ka roi ka par.
Ka kaiphod ka ong ruh ba ka jingpynduhia ka jingduktasam ka dei ka jingjia kaba ai mynsiem bad kaba iarap bha ha ka jingpynduna ia ka jingdon ka jingduk ha baroh kawei ka pyrthei. Kane ka mut ruh ba ka por ka la poi ia ka India ba kan kiew sha ka kyrdan kaba kham halor ha kaba iadei bad ka jingduk.
“Kane ka jingiaid lynti sha ka jingkiew kyrdan ka plieia ka lad ban pynkylla ia ki prokram ai jingiada ha ka imlang sahlang khamtam da ka jingthmu ban wad kham bha ia ki briew kiba dei ban ioh jingmyntoi bad ka jingai jingkyrshan kaba kham biang ia kiba duk shisha,” ka bynrap.
