Shillong, Rymphang 27: Ka kong Grace Mary Kharpuri kaba la shah jied saw sien kynthih kum ka MDC na Nongshken Constituency ka la pynpaw ia ka jingsngewkmen jongka ia kaba ki paidbah ki dang ai biang ka jingkyrshan jong ka ha kane ka MDC election 2025.
Ka kong Grace Mary Kharpuri ka la pynpaw ba kane ka jingjied jong u paitbah hi ka pynpaw ba ki paidbah ki dang ieid bad ki dang sngewbit ban kan long ka nongmihkhmat jongki sha ka District Council.
Ka la pynpaw ruh ba ki paidbah ki la jied bad kan nym man thaid hi ruh ban ai ka jingshakri ia ki kumjuh kan nang pynbha shuh shuh ia ka jingtrei jongka nangne shakhmat.
Haba kylli halor ka jingjop ka party Voice of the People Party haduh 17 ngut hakane ka MDC election ka la pynpaw ba hoid ki MDC kiba la shah rem noh ha kane ka election, ha ki san snem ba la dep ba ki dang long kum ki MDC ki trei ki ai ka jingshakri ia ki paidbah.
Hynrei kane ka jingjop bun ka party VPP ka dei ka jingbishar bad ngi hap hi ban burom ia ka rai bad ka jingjied u paidbah, ka la pynpaw bad kyrmen skhem ba ka party VPP kan lah ban leh ia ka ba bha tam eh.
Haba kylli kum ki ba shong ha ka liang pyrshah ka kong Grace Mary Kharpuri ka la ong ba haduh mynta hi kum ka party NPP kaba ioh 4 seats, ka UDP 5 seats, independent 2 ngut bad ka HSPDP shi seat ki long lang beit hajuh bad khlem pat don kano kano ka jingthaw kynhun bad ka la pynpaw ba na ka liang kiba shong ha ka liang pyrshah kin don jingmut ban ia aireng ia ka jingjied ia ka shuki CEM.
