Shillong, Naiwieng 13 : Ka Manipur ka la lah ban ialehkai bha ha ka Wushu bad ruh ha ka lympung Taekwondo jong ka 2nd North East Olympic Games 2022 kaba long hynin ka sngi.
Ha ka Wushu kaba long ha NEHU campus, ia ka takma ksiar ha ka thup taolu la ioh khur da u Salam Marshal Singh na Manipur bud sa u Tonmoy Boro ka Assam katba ia ka takma rnong la ioh khur lang da u Kyrshanbor Songthiang jong ka Meghalaya bad u Pongchoi Reham jong ka Arunachal Pradesh.
Ha ka liang ki kynthei pat ha ka thup taolu ia ka takma ksiar la ioh da ka thei ialehkai martial arts jong ka Manipur ka Yumlembam Echangtombi, bud sa ka Yani Eru na Arunachal bad ia ka takma rnong la ioh da ka Espiranza S Songthiang na Meghalaya bad ka Nistha Dutta na Assam.
Haba phai pat sha ka lympung ialehkai ha Assam Rifle Indoor Stadium ha Laitkor kaba dei ka jaka iakhun na bynta ka Taekwondo, ka Manipur ka la ioh ban khur lut naphang ia ka takma ksiar khamtam eh ha ka thup Junior Girls.
Ki takma ksiar ba ka Manipur ka ioh ban khur ki kynthup naduh ha ka thup U-42kg, U-44kg, U-46kg bad U-55kg lyngba ka Martin Wahengbam, Irom Bijaya Devi, Priyadarshini Mayengbam bad Salam Charlei Devi. Ka Assam ruh ka ïoh ban khur ar kol lyngba ka Anshika Singh (U-49kg) bad ka Nayatri Chetia (U-52kg).
Haba phai pat sha ka thup Kyorugi ha ka Liang ki Junior Boys, ka jingkhur takma ka long khleh lang ha kaba ka Nagaland ka khur kawei ka takma ksiar lyngba u Tenloi Phom ha ka (U-45kg); ka Assam ar tylli lyngba u Debasis Chetia ha ka (U-48kg) bad u Rahul Phukan ha ka (U-51kg).
Katba ka Manipur pat ka khur kawei ka takma ksiar lyngba u Arubam Kishan Singh ha ka thup (U-55kg); Ka Mizoram ruh kawei ka takma ksiar lyngba u Lalremmuana ha ka thup (U-59kg); kumjuh ka Arunachal Pradesh lyngba u Nared Jomoh ha ka thup (U-63kg).
Ki dang don bun ki jingiakhun ha ka martial arts kiba dang sah ha kine ki sngi ban wan namar ka Judo ruh ka sdang ha ka sngi u Blei ha Laban SC Indoor Stadium katba ka karate pat kan sdang ha ka sngi Nyngkong ha SAI Training Centre in NEHU.
