Shillong, Jymmang 01: Ka East Khasi Hills Cricket Association mynta ka sngi ka 1 tarik u Jymmang 2024 ka la ioh ban pynhap pyrda noh ïa ka lympung kriket U-17 Girls Inter Cluster t20 Cricket Tournament ryngkat bad ïa ka (L) Benjamin Diengdoh Memorial U-15 Boys Inter Cluster t20 Cricket Tournament 2024 ha kaba ka Mawsynram ka la long ka lahduh ha baroh ar ki lympung jong Shynrang bad Kynthei.
Ka jingïakhun ïa ka Final ha baroh ar kynthei bad shynrang ka la long hapdeng ka Sohra pyrshah ïa ka Mawsynram. Ha ka liang ki kynthei ka Mawsynram Pink Panthers ka la pynliem noh ïa ka Sohra Super Nova ban rah ïa ka namlahduh katba ka Mawsynram Cluster ka la pynliem ïa ka Sohra Cluster.
Ha ka Final jong ki kynthei, ka Mawsynram Pink Panthers ka la jied ban tied nyngkong hadien ba jop ïa ka toss, ka kynhun ka la lah ban kynjoh 72 ron shuwa ba baroh 10 ngut kin shah pynhap noh hadien 17.4 over. Ka Eliza Lyngdoh ka la tied 17 ron naki 19 bol, katba ka Libashisha Khonhngaiñ ka la khur 3/9 naki 3 over.
Haba pyrshang beh ïa katei ka thong, ka Sohra Super Nova ka la shah khanglad noh da tang 62 ron naba shah pynkhyllem baroh 10 ngut naki 13.2 over. Ka Lapynhunlang Khongngaiñ ka la tied 13 ron naki 22.
Lah ban kdew ba dei lyngba ka jingtbit jong ka Eliza Lyngdoh kaba la khur haduh 4/12 naki 3.2 over kaba la ïarap ïa ka Mawsynram Pink Panthers ban jop salit da 10 ron. Hadien kane ka Eliza Lyngdoh ka la khur syndon ïa ka khusnam Player of the Match bad ha kajuh ka por ïa ka Player of the Tournament.
Ha ka Final jong ka (L) Benjamin Diengdoh Memorial U-15 Boys Inter Cluster T20 Cricket Tournament 2024, ka Mawsynram Cluster ka la jied ban tied nyngkong hadien ba jop ïa ka toss, ka kynhun ka la lah ban buh ïa ka thong da 161 ron haduh kaba kut jong ka 20 over bad shah pynhap 5 wicket.
U Nangsan Kynter u la lah ban lehkai bha bad kamai 73 ron naki 31 bol. Katba na ka liang jong u Bashaikupar Nongdhar (rangkawangbol ka liang pyrshah) u la khur 2/19 naki 3 over.
Haba jubab ïa ka thong ba la buh, ka Sohra Cluster (A) ka la shah pynkut noh da tang 75 ron naba khyllem baroh 10 ngut tang hadien 12.3 over, u Ryan Emi Swer u la tied 20 ron naki 16 bol.
U Nangsan Kynter u la khur haduh 4/9 naki 2.3 over ban ïarap ïa ka Mawsynram Cluster ban jop da 86 ron bad khur syndon ïa ka khusnam ‘Player of the Match’ bad ruh ïa ka ‘Player of the Tournament’.
Ha kane ka sngi khylliap pyrda la wan sakhilang da ki ba ha-ïing hasem jong u BahBenjamin Diengdoh (Bam kwai ha dwar Blei), ki nongkitkam ka Mawsynram Sports Association, nangta ka East Khasi Hills Cricket Association bad ki kmie ki kpa jong ki player ba shimbynta ha kane ka lympung.
