Shillong, Jylliew 11: Ka Meghalaya Editors’ and Publishers’ Association (MEPA) ka pynpaw ia ka jingsngewkyndit bad jingsngewsih kaba khraw halor ka jingkhlad noh jong i Bah Reading M. Marwein ha ka 10 tarik Jylliew, 2021 ha ka rta kaba 72 snem.
Kum u briew uba don ka mon bajwat bad ka jingkut jingmut, i Bah Marwein i long uwei na ki nongmaitphang ha ki kam pynmih kotkhubor ha Meghalaya. I dei u nongpynmih ia ‘U Mawphor’ ha u snem 1989 bad kaba dei ka ka kotkhubor Khasi ba nyngkong ban mih man ka sngi. I la long ruh u nongpynmih ia ka kotkhubor phareng ‘Highland Post’ ha u snem 2013.
I la long ruh u Khasi ba nyngkong ban pynmih ia ka kotkhubor ba shisien shi taiew ha ka ktien Garo kaba la ai kyrteng ‘Kosi Songbad’ ia kaba la sdang pynmih ha u snem 2021. I long ruh u Khasi ba nyngkong ban don ia ka kor shon kotkhubor (printing press) kaba la biang nadong shadong katkum kane ka juk mynta.
Tad haduh ka sngi ba i khlad noh, i Bah Marwein i long u dkhot jong ka MEPA bad uba la ju kyrshan met bad mynsiem ia kane ka synjuk ha kiba bun ki liang naduh ki por kiba mynshuwa. Nalor kata i la long ruh u briew uba la ju noh synniang shibun sha ka bha ka miat jong ka imlang sahlang da ka mynsiem kaba kylluid.
Ka jingkhlad noh jong i Bah Marwein ka la long ka jingduh bakhraw iangi ki nongthohkhubor bad nongpynmih kotkhubor ha kane ka jylla. Na ka liang ka MEPA, ngi phah ia kane ka khubor sngewlem sha i kurim, ki khun, ki hynmen, para, pyrsa bad baroh kiba don ka jingiadei bajan bad une u rangbah. Ka MEPA ka phah ruh ia ka khubor sngewlem sha baroh ki nongtrei jong ‘U Mawphor’ bad ‘Highland Post. Ngi duwai ba ka mynsiem i Bah Marwein kan ioh jahthait shi junom, la ong u bah R Monarch Shabong, President, MEPA bad bah John W. Thabah, General Secretary, MEPA.
