Shillong, Jymmang 20: Mynta ka sngi la plie ia ka jaka treikam jong ka MSME export promotion council ha kane ka jylla Meghalaya, ka kam jong kane ka kompeni ka long ban iarap ia ki briew jong kane ka jylla ban pynkhreh ia ki skhim ban seng kam la jong ha kane ka jylla.
Haba kren kum u kongsan u bah A L Hek la ong ba kane kan iarap ia ki briew jong ka jylla kiba kwah ban seng kam la jong, ym dei tang ba kin pynkhreh ia ki skhim hynrei kin iarap ruh ban pynioh ram na ki kynhun bei pisa ban sdang ia ki kam ki jam.
Ha kane ka sngi u bah Hek la ong ba ki kam kiba ha khmat eh ba kin iarap kan long na ka bynta ki kam kiba lah ban pyndon kam ha kane ka jylla bad ka jingmih ka long ba lah ban pyniaid iew hapoh ka jylla la jong namar kaba kongsan eh dei ka iew.
U Jigish Sonagaro na ka BillMart la ong ba kiba bun haba ki kwah ban seng kam la jong dei ka pisa bai seng, na ka liang jong ka MSME export promotion council ym tang ba kan pynshna ia ki skhim hyrnei kan iarap ban pynioh ram ruh ban sdang ia ka kam ha ka sut kaba jem.
U Dr. D S Rawat la ong ba ka jylla Meghalaya ka don ia ka lat ban kyntiew ia ka ioh ka kot ka ain kam ia jam lyngba ka kam shangkai suwari, la ong ba kane ka kynhun kan iarap ia ki briew ha baroh ki jaitskhim lada ki kwah ban seng kam la jong.
