Shillong, Jymmang 28: Ka Final jong ka 2nd Otarwin & Drarsing Memorial Knock-out Football Tournament – 2017, ka la long ha ka sngi saitjain 27 tarik May 2017, kaba shongshit bad kaba la iaid ryntih, ha kaba ka Kynton-U-Mon Sports Social Cultural Organisation ka la pynliem ïa ka Rngikseh Sports Social and Cultural Organisation.
Ka jingialeh kai boll ka la long kaba ia khaid bha hynrei ha kaba kut ka club jong ka shnong Kynton-U-Mon ka la pynliem da 2-1 kol ia ka club Rngikseh. Ki la don baroh 10 tylli ki club kiba hap hapoh ka Raid Nongkrem, kiba la wan iashim bynta ka katei ka jingialeh kai ba la pynbeit da ka Nongkrem Sports Club, kaba la sdang naduh ka 20tarik u Jymmang 2017.
U President ka Nongkrem Sports Club, Bah Lamborsing Nongrum, ha ka jingkren u la ong ba kane ka jingialehkai la pynlong kum shibynta ban kynmaw burom ia ki arngut ki riew rangbah jong katei ka thain bad ha ka juh ka por ban jied ia ki samla kiba tbit kiban mihkhmat na ka Nongkrem Sports Club ha ka sha Polo ha ka snem 2017.
Ha katei ka sngi u Bah John Kharshiing, Co- Chairman ka Meghalaya State Planning Board, bad Working President, Meghalaya State Olympic Association, MSOA, ha ka jingiadon kum u Kongsan, u la ong ba ki samla ka jylla Meghalaya ki long kiba don ka sap ka phong kaba kyrpang ha kiba bun ki liang, bad la ong ba ka thong ka Sorkar Jylla bad ka MSOA, ban pynlong ia ka Meghalaya National Games 2022 kan plie lad ia ki samla ha kiba bun ki liang ha kaba kin wan ruh ki jingteh ia ki jaka ialeh kai kiba biang ha kiba bun ki liang.
Ha kane ka bynta u la ai khublei ia ki paidbah, ki riewshimet, ki kur, bad ki Shnong kiba bun kiba la ai sngewbha ia ki jaka madan na ka bynta ka National Games 2022, u la pyntip ba ka MSOA ka la shim khia ban buddien ba kan mih ka Sports Policy kum shibynta ban kyntiew ia ka kam Sports hapoh ka jylla bad ban plie lad ia ki samla ba kin ioh ban mih sha ki kyrdan ia leh kai ha ka National bad International Championship.
Ha kaba ia dei bad ka jingpynlong ia ka 2nd Otarwin & Drarsing Memorial Knock-out Football Tournament – 2017, u Kongsan u la ai khublei ia ki nongkitkam jong ka Nongkrem Sports Club, kiba la shim khia ban kynmaw ia ki rangbah jong ka shnong, bad u la ong ba ka dei ka kamram ka jong ngi ki buddien ia ka nuksa jong ki longshuwa bad ban aiti sha ki Longdien.
Ha katei ka juh ka sngi ka Nongkrem Sports Club, ki la pynkup burom ia i samla Idarikor Warshong, iba la ioh iba shong sah hapoh ka Raid Nongkrem iba la ioh ia ka kyrdan kaba ar ha ka SSLC Exam 2017. Ha katei ka jingialehkai la ia don lang u Bah B Lyngdoh, Chairman, Nongkrem Pyllun, ki Rangbah Shnong, na ki shnong kiba hap hapoh ka Nongkrem Pyllun.
Ha kaba pynwai ki nongpyniaid ka NSC, ki la ai khublei kyrpang ia baroh ki rangbah kynthup u Kongsan kiba la noh synniang ia ka jingpynlong ia kane ka tournament. la pynwai ia ka jingialehkai kaba ar da ki kyntien ai khublei na u Bah B Khyriemmujat, Publicity Secretary, Nongkrem Sports Club.
