New Delhi, Jymmang 15: Hapoh ka shi snem mynta, ka prokram eSanjeevani, kaba long ka National Telemedicine Service jong ka MoHFW ka la ai jingshakri ia palat 50 lak ki nongpang.
Ka jingai jingshakri ki doctor ia ki nongpang lyngba ka internet ka dei ka kam ba la sdang da ka tnat ha u Iaiong 2020 katba dang khang ki OPD ha ka ri ha ka por jong ka pakhang dam kaba nyngkong. Ka eSanjeevani ka dei kaba treikam ha 31 tylli ki jylla bad UT jong ka ri bad man ka sngi 40,000 ngut ki nongpang ha kylleng ka ri ki pyndonkam ia kane ka rynsan ban ioh jingsumar kaba lait na ka jingma ban pynsaphriang ia ka jingpang COVID-19.
Ka prokram eSanjeevani ka don ar bynta, eSanjeevaniAB-HWC – ka rynsan jong ki doctor – kaba treikam ha baroh ki jaka ai jingsumar jong ka ri hapoh ka skhim Ayushman Bharat jong ka Sorkar India. Haduh mynta ka prokram eSanjeevaniAB-HWC ka la treikam ha palat 18000 tylli ki jaka ai jingsumar bad palat 1500 tylli ki Hub.
Shuwa u Nohprah 2022 kane ka rynsan kan treikam ha 1,55,000 tylli ki jaka ai jingsumar. La sdang ia ka eSanjeevaniAB-HWC ha u Naiwieng 2019 bad 22 tylli ki jylla ki la sdang ban pyndonkam ia kane ka rynsan na ka bynta kumba 2 million ngut ki nongpang kiba la ioh jingsumar na ki doctor bad ki specialist.
Kumba 21,000 ngut ki specialist, ki doctor bad ki community health officer ki la ioh jinghikai bad ki la iasnohkti lang bad ka prokram eSanjeevaniAB-HWC.
Kawei pat ka bynta jong ka National Telemedicine Service ka dei ka eSanjeevaniOPD. Ia kane la pyntreikam ha 28 tylli ki jylla bad UT. La pyntreikam palat 350 tylli ki OPD hapoh ka eSanjeevaniOPD, ha kaba palat 300 tylli ki dei ki specialty OPD. Palat 30,00,000 ngut ki nongpang ki la ioh jingsumar lyngba ka eSanjeevaniOPD, kaba long ka jingai jingsumar kaba lait na ka jingsiew. Kane ka rynsan ka ai jingsumar ia ki briew ha la iing.
Naduh ba sdang kane ka khlam, ka National Telemedicine Service jong ka tnat ka koit ka khiah jong ka Sorkar Pdeng hapdeng ki doctor bad ki nongpang ka la kiew bha bad bun kiba la sdang ban pyndonkam ia ka. Ka eSanjeevani ka treikam ha ryngkat ki lad ai jingsumar ha ka ri kiba la mad shibun ki jingeh.
Ha ka por ba la sdang ia kane ka prokram ha u Iaiong jong u snem ba la dep, la saindur ia ka eSanjeevani kum ka rynsan ban ai jingshakri ia ki jingpang kiba lait na ka COVID, hynrei, namar jong ki jingmyntoi jong kane ka kam, ki jylla ki la kloi ban pynkylla ia ka eSanjeevani ban ai jingsumar ha ki kam ba iadei bad ka COVID-19. Ki jylla ki la sdang ia ki OPD ban peit bad ai jingsumar ia kito kiba pang COVID-19 kiba hap sah marwei ha la iing.
Don katto katne ki jylla kiba dang pyrshang ban sdang ia ki Special Home Isolation OPD ha kaba yn lah ban pynshisha lada ki briew ki don jingpang COVID-19 bad na ka bynta kane ka kam, ki jylla ki thmu ban pyntrei da ki samla kiba don ha ka snem kaba khatduh jong ka jingpule MBBS.
Namar ka jingbun ki case thymmai, don katto katne ki jylla kiba pyndonkam ia ka eSanjeevaniOPD 24 kynta shi sngi. Ka Tamil Nadu ka dei ka jylla kaba nyngkong ban don 10 lak ki jingai jingsumar lyngba ka eSanjeevani. Ka tnat Defence ruh ka la iatrei lang bad ki doctor ba la shong thait na ki kynhun shipai ban ai jingsumar ia ki paidbah ha katto katne ki jylla.
Ha ka ktem jong ka C-DAC’s ha Mohali, ki nongsaindur ia ka eSanjeevani ki dang ialeh ban wanrah sa kawei ka bynta jong ka eSanjeevaniOPD ka ban plié lad ia ka jingsdang jong ki National OPD ha ka eSanjeevani OPD.
Kine ki NationalOPD kin plié lad ia ki doctor ba kin ai jingsumar ia ki nongpang kiba don ha kano kano ka bynta jong ka ri. Kane kan iarap bha ban pynbeit ia ka jingeh jong ka jingduna ki doctor bad ki specialist ha katto katne ki bynta jong ka ri.
Ki jylla ba ialam lynti ha ka jingpdiang (ka jingbun ki jingai jingsumar) ia ka eSanjeevani ki long ka Tamil Nadu (1044446), Karnataka (936658), Uttar Pradesh (842643), Andhra Pradesh (835432), Madhya Pradesh (250135), Gujarat (240422), Bihar (153957), Kerala (127562), Maharashtra (127550) bad Uttarakhand (103126).
