Shillong, Nohprah 06: Ka Khasi Students’ Union (KSU) hynne ka sngi ka la dawa na ka North Eastern Indira Gandhi Regional Institute of Health and Medical Sciences (NEIGRIHMS) ban shah ia ki samla trai ri trai muluk ba kin thoh eksamin hapoh ka Jylla kumba ki kwah.
Ki nongialam ka KSU ki la kynduh ia u Director, NEIGRIHMS Prof. Dr. Nalin Mehta bad la aiti ruh ka dorkhas ba pynpaw ïa ka jingpyrshah halor ka jingphah thoh eksamin shabar Jylla na ka bynta ki kam ba lait haka grade B bad C.
Ha ka shithi la kdew ba ka seng ka la ioh pdiang ki jingujor ba bun ki samla trai ri trai muluk, ba ki hap ban leit thoh eksamin thep kam ha ka grade B, C sha kiwei ki Jylla
U General Secretary ka KSU Seng kmie u samla Donald V Thabah haba kynthoh halor kane u la ong kane kam dei shuh ka sien ba nyngkong ba ki samla ka Meghalaya ki hap ban leit sha kiwei pat ki Jylla ban thoh ia ki eksamin thep kam.
U la pynpaw ka jingsngew diaw na ka liang ki samla trai Ri trai muluk namar ia ki jaka thoh eksamin la pynhap sha kiwei ki jylla bad kane ka dei tang ka buit ban pynduh mynsiem ia ki samla ban thep kam ha kane ka Hospital.
U samla Donald V Thabah u la ong ka seng ka dawa na ki bor ba khmih ba ki dei ban sngewthuh ba ki samla trai ri trai muluk, ki ba thepkam ki ba bun ki wan na ki longïing longsem baduk baduna jingioh bad kane ka jingleh ka la buh jingeh bha ia ki ban leit sha kiwei ki Jylla ban thoh ia ka eksamin thepkam bad kane ka dei hi ka jingleh khnang ban pynduh lad iaki trai ri trai muluk.
U la ong ba ka tarik ba pynmih ia ki Admit Card ka long kaba la slem bha bad wat kito kiba lah ban pynlut ban leit thoh eksamin sha kiwei ki Jylla ruh, ki la shem jingeh ba kin pynbiang kyrkieh ia ki jingdonkam ha ba ïadei ka leit ka wan.
U la ong ba ki don ki samla kiba thep kam bun tylli, bad lada ka jaka thoh eksamin bad ka tarik ka wan ha kajuh, kan buh jingeh bha ia ki samla ban beh sha ki jaka ban thoh eksamin, namar ki samla ki la siew ia ka bai thepkam.
Ka NEIGRIHM ruh ka dei ban ailad lang ia ki. ban thoh iaki eksamin. Halor kane ka KSU, ka kyntu ia ki bor ba dei khmih ban shimkhia bad ban pynthikna ba ki samla trai Jylla ki ioh ban thoh eksamin ha la ka Jylla.
Ka KSU ka pynpaw ruh ba ka NEIGRIHMS ka dei ban pynlong hi ia ki eksamin thep kam ha ka jaka ban aiwai sha kiwei ki Company namar kane ka lah ban wanrah ka jinglehthok ia ki samla trai Jylla namar ki Company na bar kim da sngewthuh ia ka jingsngew ki paidbah ka Jylla.
Ha kajuh ka por Ka KSU ka dawa ruh ban ailad shwa ia ki samla trai Ri trai muluk na ka bynta kino kino ki kam lada ki samla ki bit ki biang
