Shillong, Naiwieng 20: Ki shipai BSF kiba ap ha khappud kila ong ba ka jingkhaii masi beain sha Bangladesh kala jyllei palat na ki lai tylli ki District, West Jaintia Hills, East Khasi Hill bad East Jaintia Hills ban ia khun pyrshah ia kane kila thaw ia ka kynhun kaba kyrpang na ka liang jong ki shipai BSF.
Kane ka kynhun shipai kaba la thaw kyrpang ban khanglad ia kane ka jingkhaii masi beain sha Bangladesh kala ioh ban kem ia ki hynriew ngut ki briew kiba dei ki nong India na jan Dawki ha West Jaintia Hills bad la ioh ruh ba kurup haduh 53 tylli ki masi na ki trok bad kane ka long pyrshah ia ka ain “Prevention of Cruelty to Animal Acts”.
Ha ka jingthoh kit ia kito kiba la shah kem ha ki shipai BSF, kila iathuh ba ia kine ki masi la wanrah na Guwahati na Khanapara bad kine ki masi ki dei na kylleng jong ka jylla shatei lam mih ngi jong ka Ri India bad ia kine ki masi la kit ha kata ka rukom ban leit na ka jingsha kem ha ki pulit ha khappud.
Ban ia khun pyrshah ia kane ka jingkhaii beain ia ki masi sha Bangladesh na ka liang jong ki BSF ki kyrpad ia ki bor jong ka sorkar jylla ban ia treilang ban peit ba kum kane ka jingkhaii be ain kan nym don namar kane ka jingkhaii masi beain ka don jingiadei bad ki kam khaii drok bad ia kane ka pisa kaba mih la kyrshan ia ki seng lehnoh ha kane ka jylla Meghalaya.
Na ka liang jong ki BSF kila ong ba kane ka jingkhaii masi beain ka don jingiadei bad ki kam khaii drok bad ia ka pisa kaba mih na kane ka jingiakhaii la bei sha ki kynhun lehnoh kiba dang trei kam ha kane ka jylla Meghalaya.
