Shillong, Rymphang 26: U Myntri ba dei peit ia ki kam bording u Abu Taher Mondal u la iathuh ba ha ka jingialang jong ka kabinet kaba la long mynta ka sngi ka jingialang kala pdiang ia ka “Power Policy” ka polisi kaba thymmai ba ia dei bad ki kam bording.
Haba kren ha ki lat pathai khubor u myntri la ong ba ia kane ka polisi la pdiang ha dien ka jingiakren kaba bniah ha ka jingialang jong ka kabinet, ha kane ka polisi kiba bun ki dei ki juh tang la bynrap katto katne kiba thymmai.
Ha ka polisi kaba rim kam don ia kata ka bynta kaba la tip kum ka ‘Pump Storage’ kala don ruh ka jingkylla khyndait ha kaba ia dei bad ka jingring light Solar, kane ka polisi kaba thymmai ka long ban khring ia ki nongbei pisa ba kin wan ban shna ia ki jaka pynmih bording, kine ki long kiba la pynrung thymmai.
Kane ka polisi kaba dei kaba thymmai bad kane ka dei tang ka polisi bad ki kynhun kin sa wan hato kane lah ban leh ne em ynda kila ia kin sa ia kren, ka jingiateh kular ka long tang ban ia kren hato lah ban long ne em kum katta ka kam.
Kane ka polisi ka long ruh kum ka jingpynmih bor ding na ka Um, na u dewiong bad ka sngi bad ha ki por ban wan ka lah ban long kum ka Hydrogen Project, ha kine ki 15 snem kiba la dep haduh mynta ym don ban wan ban bei pisa ha kikam pynmih bording.
U Mytnri u la iathuh ba ki don san tylli ki kompeni kiba la shah pynduh noh namar ba kim shym la lah ban sdang ia ka kam wat la kila ia soi ha u snem 2008 haduh 2010, ka jingpynduh noh ka long ban ai lat ia kiwei ba kin wan.
Na ka liang jong ka MeECL kala buh ia ka thong ban pynmih 300 MW bad kane ka long ban pynmih ynda la dep ka bynta ba ar jong ka Leshka ka jingpynkreh ia ka skhim la jan dep bad da kane ka polisi lah ban ia treilang bad kiwei ki kynhun la dei jong ka sorkar pdeng ne jong ki riew shimet.
