Shillong, Nohprah 06: u Chairman jong ka Ri-Bhoi Tourism and Environment Development Forum (RBTEDF) u Bah Plielad Tiewsoh u la ong ba ka seng kala shim ia ka rai ban pynlong ia ka “Native Fiesta” kaba ar sngi lynter ha Umiam ban kyntiew ia ki kam jngoh kai pyrthei ha kane ka jylla bad khamtam hapoh jong ka Ri Bhoi District.
Kum u Chairman, u Bah Tiewsoh u la batai ba kane ka jinglehkmen kaba ar sngi, ka long ban pyni sha ka pyrthei ia ki jinglong kyrpang kum ka jaidbynriew Khasi Garo bad Jaintia ha kaba yn sa pyni iala ki jinglong tynrai jong kine ki jaidbynriew, la ka long ha ka riam, ka rukom bam bad ha kine ki ar sngi yn sa ai khusnam ruh ia ki nongrwai bat bit tam.
La ong ba ka jinglut na ka bynta kane ka kam kan long kumba 50 lak ei ei bad kila kynjoh ktien mynta ia ka tand jong ka sorkar pdeng kaba dei peit ia ki rit paid, ka NEC bad kum juh ia ka sorkar jylla, hynrei na ka liang jong ka seng kala rai ba lada ki ioh ne kim ioh ia kane ka jingiarap ruh kin iaid sha khmat bad kane ka kam.
Ban kham khring ia ki briew sha kane ka jinglehkmen pyrem ka seng kan pyntip ruh sha ka ri India lyngba ki lad jingpynbna khamtam eh ha ki nongbah jong ka Ri India lyngba ki lad pathai jingtip, yn leh ia kane ka long ban khring ia ki briew sha kane ka jylla ba kin wan ban pynlong ia ka jylla Meghalaya kum pdeng jong ki jaka jngohkai pyrthei.
Haba la kylli hato kum ka seng haba ka kwah ban kyntiew ia ki kam jngohkai pyrthei ki long ne em ban pdiang ia ka jingbei pisa na kiwei ki ri jong ka pyrthei ban kyntiew ia ki kam jngohkai pyrthei ha kane ka jylla, kumba ka long na ka liang jong kane ka seng kam pat da la long kaba la kloi ban pdiang namar ki la ong ba ka dang kloi eh ban ia kren ia kane ka phang.
