Shillong, Iaiong 03: Ka jingwan rah ka party VPP ha kane ka Assembly ba dang shu dep ia ka mat ban peit ne pyrkhat biang ia ka Reservation Policy bad ka Roster System katkum ka rai jong ka Meghalaya High Court ba donburom ka la pynkhie im biang sa shisien ia katei ka mat kaba ktah mat iong ia ka iohkam iohjam ki khun samla Khasi-Jaintia.
Wat la ki seng bhalang baroh na Garo Hills ki pyrshah ia iap ia im halor kane,ki kynhun na Khasi-Jaintia te kin iai ktik beit ba ki shah long langknia ei ha katei ka policy. Ka jingpynkhie im ia katei ka mat ne issue kan pynktha khlieh shi katdei eh ia u Chief Minister ka Meghalaya lem bad ki kynhun jongu.
La iohi ruh ba katei ka system ka la phiah arliang ia ka Meghalaya ha ki ar kynhun ki jaitbynriew(ST),kata,ki Khasi-Jaintia bad ki Garo.Kumba ka long mynta,katei ka policy ka pynioh nong eh ia ki jaitbynriew Garo.
Lada ka sorkar kan pynhun ia ki Khasi-Jaintia ruh ka la wai artad ha Garo Hills.Bad lada ka pynhun pat ia ki jaitbynriew Garo kumba long mynta,kan wai artad ha ri Khasi-Jaintia ruh.Kan don ka jingktah ruh wat ia ka lawei jong ki political party kiba ia don lang ha kane ka sorkar MDA-2, la kilong ki regional ne ki national party.
Lada kane ka sorkar MDA-2 ka leh mynthi ruh ki paidbah kin nym aili satia ia ka.Lada kane ka thma ioh kam sorkar kan khie shisha,ka jingiadei hapdeng ki jaitbynriew Khasi-Jaintia bad Garo kan nang ia jngai nang ia jngai shuh shuh bad kan sa poi ka por ba ki lah ruh ban ia khlad lok noh shisha da kaba ai noh ia la ka jong ka jong ka state jongki.
Kane ka mat ka long ruh kaba don jingma bha haduh katta katta (very sensitive).Lada ka sorkar u Conrad Sangma kan bakla rai hangne,kan sa jot artad baroh shi rta bad kan shitom ruh ban khie khlieh biang hadien habud. Dei hangne ba ki ju ong,”lada ai ruh ym long bad lada ym ai ruh ym long”U la wai lada u leh bad u la wai ruh lada um leh.(He is doom if he gives,he is doom if he does not give”.
