Shillong, Nohprah 31: Ka synjuk ki barikor na jylla Meghalaya, ka Ri Academy of Visual Arts ka la pynlong ia ka lyngwiar thohdur jong ki barikor ha ICSSR, NEHU ba la plie da u Kher Rangbah ka tnat sorkar Mattithaw bad Deiriti, u Bah Frederick Roy Kharkongor.
La iasnoh kti lang da ka Santiniketan Kala Bhavan Praktoni, ka synjuk ki barikor rangbah na Santiniketan na ka bynta ban sei pyrthei ia ki sap kyrpang jong ki samla ka jylla ki ba angnud ban trei bad kyntiew ia lade kum ki barikor batbit.
La aiti sahnam ia kane ka lynwiar thohdur ha ka kyrteng jong u Myllung Soso Tham, kum ban sot na ki snap jingstad jong ka saiñ pyrkhat jong u na ka bynta ban tei ia ka imlang sahlang.
La nguh burom ia u Myllung Soso Tham da baroh ki ba ia don ryngkat naduh ki kynrem ki lyndan haduh ki paidbah da ka ba thoh shun ha ka sladur ba la mang lypa na ka bynta ka jingthmu.
U kongsan ha kane ka lyngwiar thohdur, u Bah F R Kharkongor u la pyrto ia ka thoh ka tar ka ba la kyrsoi na ka janor bad dohnud jong u Myllung Soso Tham ha kita ki snem ki ba ka imlang sahlang ka dang doh ha ki latlat jong ka synshar donbor ka sorkar Bilat bad ha ba dang sdang seilung ka thoh ka tar Khasi.
U la pynkynmaw ruh ba ka snap tynrai Khasi ka shong tynrai ha ka khyndew, ka kur bad ka ktien, ha ka ba donkam ban pynneh pynsah na ka bynta ka lawei jong ka imlang sahlang.
Ka jinglong dukha jong ki barikor ha ka lynti jingim ka long ka phang ka ba la phalng lyngba ka jingkren jong ki kynrem lyndan ha kane ka sngi, ba kynthup ia u khliehduh ka ICSSR u Prof B Panda, bad u Dr Janak Jhankar Narzari, u khliehduh jong ka Santiketan Kala Bhavan Praktoni.
U Dr Janak Jhankar Narzari u la bynñiaw halor ka jinglong jingman ha ka thaiñ shatei lammihngi ka ba la sahdien ha ka laing jong ka thohdur, wat lada ka mynsiemn shitrhem jong ki samla ka iai kyrsoi bad na ka por sha ka por ki sap nylla jong ki barikor ki dang iai shylluit manla ka por.
U nongialam rangbah jong ka synjuk ki barikor ha jylla, u Bah Raphael Warjri u la kubur ia ka jingkren jong kita ki kynrem lyndan bad u la ban khia halor ka jingdonkam ban mih ki shlem hikai shlem pule ha ka liang ka kam thohdur thohdar ha jylla na ka bynta ban kyntiew ia ki samla ki ba angnud ban kiew irat ha kane ka liang.
Kum shibynta ban kyntiew ia ka thohdur thohdar ha jylla bad ban ban plie lynti ia ki barikor na jylla, ka Santiniketan Kala Bhavan Praktoni ka la ia soi ia ka dorkhas soskular bad ka Riti Academy of Visual Arts, Shillong na ka bynta ban sam kylliang ia ki jingtip bad jingstad shaphang ka thohdur da ki lympung ki ba yn pynkhreh markylliang ha Shillong bad sha kiwei kiwei ki jaka ha Ri India.
Ha ka Lyngwiar Thohdur ka ba la iaid shitrhem kumba shiphew sngi ha ICSSR, salonsari NEHU ka la don ruh ka jingiaphylliew jingmut jong ki barikor na baroh arliang ha ka ba pyninam ia la ki sap ki phong bad ban batai ia ka jinglong jingman jong ka Thohdur ha la ki jylli lajong.
Kumta ki don ki mat iatai ki ba yn sa pashat jingmut da ki barikor na Shillong bad na shabar ka jylla ba kynthup ia u Prof. Janak Jhankar Narzari, Soumitra Chatterji, Rathin Kanji, Prof. Niaz Majumdar, Falguni Mukherji, Shamita Goswami, Ketaki Choudhury, Mario Pathaw bad Raphael Warjri, halor ki phang ba ki ia tyngkhuh ha la shimet bad ki ba iadei bad ka lyngwiar thohdur ha ka imlang sahlang.
Kum shibynta jong ka Lyngwiar Thohdur ba la jer Thoh Shun Art Camp 2023, ka synjuk ki barikor na jylla, ka Riti Academy of Visual Arts ka la pynphuh pynphieng da ka Khusnam ha ka kyrteng jong u Ma S Quotient Sumer ba la jer ka S Quotient Sumer Excellence Award 2023.
ha kane ka sngi la pynkup burom ruh ia ki barikor ba la shimbynta ha kane ka lympung ka ba la long ha ka 24tarik Nohprah, 2023. u kongsan ha kane ka sngi, u Dr Janak Jhankar Narzari, President ka Santiniketan Kala Bhavan Praktoni bad u Principal barim jong ka Kala Bhavan, Viswa Bharati University, u la pyrto bad ñiewkor ia u nongjop ia ka khusnam, u Ma Heibormi Sungoh u ba la synñiang sha ka roi ka par jong ka thoh ka tar Khasi.
U Ma Heibormi Sungoh u dei u riewtbit bakhraw ha ka deiriti jong ka jylla Meghalaya, ba shlei da ki jingtip shaphang ka deiriti tynrai Khasi, khamtam ha la ka thaiñ Pnar jong ka Jaintia Hills. U dei ruh u nongthoh, u myllung, u kaitor bad riewtbit ha ka rwai, ka put ka tem bad ka shad tynrai, u ba tip sani ruh ia ki snap ka Niamtre.
Kum u nongthoh jong shiteng dorjon ki kot ha ka ktien Khasi bad phareng, u Ma Heibormi Sungoh u la shim bynta ha jylla, ha ka thaiñ, ha ka Ri India bad katto katne ha satlak pyrthei ha ki lyngwiar ka thoh ka tar bad ka deiriti, bad u trei shitrhem ruh ha byllai ki shlem deiriti kynthup ha ka North East Zonal Cultural Centre.
Ha ka ba ainam ban sien syntiew ia ki kam bakhraw ba la noh synñiang ha ka jylla bad ha Ri India, ka Synjuk Ki Riewtbit Riti Academy ka ñiewkor bad pynkup burom da ka Khusnam Kynmaw Tympang ia u Ma S Quotient Sumer- 2023.
Ki khatar ngut ki barikor na Santiniketan ki long u Dr. Janak Jhankar Narzari, Soumitra Chatterji, Rathin Kanji, Prof. Niaz Majumdar, Rishi Barua, Sheema Barua, Falguni Mukherji, Samita Goswami, Ketaki Choudhury, Saleha Ahmed, Krishna Dutta, Babita Das.
Na Shillong ki long u Mario Pathaw, Phaibha Kupar Kharlukhi, Benedict S Hynniewta, Frederick D Hynniewta, bad Raphael Warjri. U Dr Janak Jhankar Narzari u la kren sani halor ki kam thohdur jong u ki ba la sahnam ym tang ha Ri India, hynrei ki ba la ieng kynshyeng ruh ha ki shlem thohdur bad shlem imlang sahlang ha kylleng ka pyrthei, khamtam ha ki Ri Europe.
U samla Mario Pathaw u la pyninam bad kren bniah halor ki kotdur ka jukshai mynta ba la jer ki digital comic book on Khasi cultural heritage titled ‘exploring the relationship between words , images and the indigenous representation of the Khasi Jaiñtia people’ bad u bah Benedict S Hynniewta u la pyninam ia ki kam thohdur ki ba naduh ki snem ki ba sdang jong ka kam thohdur jong u.
Ki kam thohdur ba dang shen ba la shna lyngba ki kor ha ka jukshai mynta ba la tip kum ki digital format. U Soumitra Chatterji u la pyninam ia ki dur thoh lyngba ka jingkren ka ba sani halor ka sawkun jong ki thaiñ Rilum ha kylleng ka Ri India halor ka mat ba la jer ‘A glance at ‘Mountains’ in landscape painting of the Far East, India and the West- and the influence of the same on my artistic journey’.
U Prof. Niaz Majumdar na ka American International University-Bangladesh, Dhaka, Bangladesh u la pyninam bad kren halor ka mat jong ka miatdur bad mattithaw kum ki atiar jong ka pule dangle ka ba la jer “Education through Arts and Aesthetics: Teaching the Philosophy of Rabindranath Tagore”.
ki barikor kum u Rishi Barua, Rathin Kanji, Ketaki Choudhury, Seema Barua, Falguni Mukherji, Samita Goswami and Babita Das ki la pyninam bad kren bniah halor ki kam thohdur lajong lyngba ki ryta bad shaphang ka san ka mer jong ka thohdur ha Ri India.
Ka jingpyninam ia ka thohdur ka la rasong borbah da ka durim Apot ba la shna da u Raphael Warjri. La jan baroh ki barikor ki la ai jingiaroh bad kdew la ki jingsngew shimet ha ka ba pynwandur ia ka durim ka ba la phalang ia ka riti dustur tynrai bad ka deiriti bakynsai jong ki paidbynriew Khasi.
U Dr Janak Jhankar Narzari u la kynthoh ba ka durim Apot ka la dei u mawnam jong ka kam shna durim ha ka thaiñ bad lehse ha Ri India. U Prof Niaz Mazumdar u la rah skong ia ka miatdur jong ka durim ka ba la phuhmat haduh katta katta.
Kiwei kiwei ki barikor ki ba la khmih sani ia ka durim ki la kynthoh ba ka durim Apot ka shongnia ban ioh ka nam ka burom ka ba khraw ha ka liang ka khana puriskam ‘U Tiewlarun’ ha ka ba pynishai ia ka riti dustur Khasi bad ha ka jinglong janai jong ka rukom shna katkum ki kor ki bor ka juk mynta.
Ha kane ka sngi u Raphael Warjri u la pynbna paidbah ruh ba la buhti ia ka Khusnam Kynmaw Tympang ha ka kyrteng jong u Barikor Prithpal Singh Sehdave ba ju khot ieit u Ladi. Ka shlem barikor ka ba bud ryngkhi, yn sa pynkhreh da ka Santiniketan Kala Bhavan Praktoni da ka ba werlang ia ki barikor na jylla ban shim bynta sha Santiniketan ha jylla West Bengal.
Ka la don ruh ka suwari sha ka shlem deiriti jong ka shnong Pahambir ba la khlieh da u Bah Rani Maring bad synran lang da ki khun ki pyrsa ban pynbiang da ka bam ka dih tynrai na Ri-Bhoi.
Ha ryngkat ruh ki khanatang bad puriskam ba la iathuh da u Bah Rani Maring, u la kynud da ki sur tynrai lyngba ki jingtem jingput tynrai kum ka duitara, ka maryngod, ka saitar bad ka mieng. Nangta ka la don ruh ka shang suwari sha ki lum ki wah jong ka thaiñ Sohra ka ba la pynbyrngia ia baroh ki barikor na Santiniketan.
