Shillong, Lber 12: Ka Rakhe Lyngkhuh Laiphew Snem (Pearl Jubilee Celebration) jong ka synjuk ki barikor Khasi, Riti Academy of Visual Arts ka long ha ka 14tarik Lber, 2021 ha MAD Gallery, Jaiaw Langsning Shillong.
La seng їa kaSynjuk da ka jingthmu ban kyrsoi, ban їaineh bad ban pynphriang їa kajingsngewthuh ba paka bad ba janai shaphang ka miatdur da ka ba kham shimkhia bad pynkiew rasong їa la ki snap tynrai Khasi ha ka liang ka Thohdur bad ka Thohkot Thohsla.
Kat kumba long ka juk bad ki jingjia na ka pateng sha ka pateng lyngba ki snem bad ki ryta ha kaimlang sahlang kiei kiei baroh ki la kylla dur lyngba ka pyrthuhbud їa ka snap jong ki paidbynriew byllien ki ba khrawpaid na Rithor.
Na kata ka daw ka long ka ba donkam ban ri, ban kynshew bad tyngkai їa la ki thiar jingtip tynrai kum ki tyllong jong ka rukom mutdur, thawlade bad jingjanai lyngba ka mynsiem shitrhem ban snoh rdin ha kino kino ki kam thohdur mynta bad ka phangma jong ka miatdur.
Kane ka trei shitrhem monlade bad ka khihmynsiem ka dei ka kam ba shynna jong ka Synjuk Riti Academy na ka bynta ban thaw ki bor ban tei bad ki lad ha ka thohjer thohnam bad ka shnakam shna jam na la ka deiriti lajong.
Naduh ba la seng ha u snem 1991 ka Riti Academy of Visual Arts ka la їaid lyngba ki raieh raidam bad thom їa ki diengpyngkiang na ka bynta ban kyrsei ka shlem ka ba shngaiñ na ka bynta ka synjuk ki barikor ki ban trei minot bad duriap ban dup shylluit bad seilung la ki sap tynrai ha ka sapthaw bad ka buitthaw haduh ba kin da rasong sha ka mattithaw ba paka.
Ki don byllai ki mat їatai, kyrhai ki jingmut ban pynsnoh ha ryngkat shikatdei ki kam ban pun, ban pet bad ban shna nakabynta ka bhalang jong ki parabarikor.
Ka synjuk ka shimti ban kitkhlieh na ka bynta ban sdang, ban kyrsoi bad ban bsa mynsiem da ka lynti babha ban shem ka jingjop sha ka thong na ka bynta ka dawbah ban kyntiew, tyngkai bad pyrto їa la ki snap tynrai na ka thohdur mynnor. Ha ka juh ka por ki barikor ki aiti bad duriap ban tbit ha ka thohdur mynta na la ka deiriti.
Katto katne ki kam thohdur ba kongsan ki long: Ka Thoh Shun International Art Camp naduh u snem 2005 ter ter haduh mynta mynne. Ha u snem 2007 la pynlong ka lympung Thoh Shun Art Exhibition ha Dhaka, Bangladesh na kabynta ki barikor na ka thaiñ Shatei Lammihngi ka Ri India da ka ba їoh jingkyrshan na ka Indian High Commission, Dhaka, bad ka Greater Sylhet Indigenous People’s Forum.
Ha ka ba thwet shuh shuh їa ki lad їoh myntoi ha ka thohdur, bun na ki barikor ki sah ha ka lyngngoh ha ba ki wad їa ka mut, ka daw bad ka snap pyrkhat ban kilan ha lade lyngba ka kysoi bor thawlade bad ka shem mynsiem. Ha ka ba tba ruma da ki thiedsnam jong kine ki riewwad jingtip ha pyntha baїar jong ka deiriti la shylluit ka Thwet Art Camp.
Ka lympung Thohshun bad Thwet Art Camp ki la kyrsoi ban thaw rynsan na ka bynta ban pyninam їa ki kam thohdur na ka thaiñ. Ka synjuk Riti Academy of Visual Arts ka la seng їa ka shlem pyninam MAD Gallery ha nongbah Shillong ban suitrong, ban kyrsanbor bad bsa katkum ka jingmad bad jinglmun jong ki parashnong parathaw.
Wat lada MAD ka dei ka saiñkyntien ha ka ktien phareng Make-A-Difference, hynrei ka don ka jingmut ba khiathew ha ka ktien Khasi ban MAD їa kaei kaei ka ba sngewtynnat ha lade; wat la ha ka phareng ka mut ba lymwir ba bieit, ka phalang pat їa kata ka snap jingngeit ba la ‘thohshun ki blei’ їa kata ka shlem pyninam MAD Gallery.
Kane ka pharshi ka dei ka pyrtuit ba la sin khnang kum ka lyngwiar ban їa lumlang, їa turlang ban їa mir jingmut ha jylli seisap ka ban nang tuid lang chirup da ka mynsiem shitrhem їa ka thohdur.
Kiwei kiwei ki kamminot ki long ka ba shna durim (filmmaking), ka sawangka ha ka ba ki la shah jied ha ki rynsan ha satlak pyrthei, kum ka Film South Asia 97 ha Kathmandu, Nepal; Dhaka International Short Film Festival 1998 ha Bangladesh; International Indigenous Theatre Festival Dhaka 2015 bad kiwei kiwei de.
Ka lympung Celebration of Bamboo Culture of North East India 2016 ba la kyrshan da ka Indira Gandhi National Centre for the Arts, New Delhi; CMS Vatavaran Environment and WildLife Film Festival 2010 bad ka ba la buhti їa ka khusnam Crystal Gayle Memorial Award naduh u snem 2018 їa ki ba tbit tam eh ha ka Thohdur bad ka Thohkot Thohsla. Ki barikor ba la їoh pdiang ban pynkupnam ki long u samla Skhemlang Hynñiewta- 2018, Dr. Debraj Debbarman- 2019, samla Mario Pathaw- 2020.
