Shillong, Jymmang 26: Ka Rymbai Shkenshynriah SC bad ka Langsning FC ki la lah jam sha ka semifinal jong ka 5th Meghalaya State League, ka Meghalaya Football Assoiciation bad ba la kyrshan ia ka da ka Directorate of Sports & Yourh Affairs, bad kane la wan hadien ba la dep ki jingiakhun ba khatduh ka quarterfinal league stage, ba la long ha madan ka SSA Stadium, mynta sngi.Na ka liang ka Rymbai Shkenshynriah kaei ba ka donkam ia ka ka long ba tan ka nam ban iakhaid kan jin da la biang pura ia ka ba kan jam sha ka semifinal, pynban kane ka kynhun ka la lah ba kan pynliem syndon haduh 5-2 pyrshah ia ka Nangkiew Irat FC, ha kaba ia kine ki kol baroh kidei kiba la thep ia ki ha ka kylla miet.
Ia ki san kol ka Shkenshynriah la thep ia ki da ka Iaishah Bareh (56′), Hesmiki Rymbai (69′, 90’+3), Niponghi Sumer (77′) bad Harita Suchen (90’+4).
Katba ia ki ar kol ka Nangkiew Irat FC la thep ia ki da u Brolington Warlarpih (58′) bad Justerwell Tham (81′).
Ha shwa jong kane ka jingiakhun, ka Langsning FC ka la lah ba kan pynskhem bha ialade ba kan bat ia ka kyrdan ba nyngkong na ka Group B hadien ba ka la lah ba kan pynliem ia ka Maram FC da 2-0 bad ia kine ki kol la thep ia ki da Donlad Diengdoh (41′) bad u Nelson Rymbai (48′), ha baroh ki ar kylla jong ka jingiakhun.
Ka Langsning FC ka jam sha kane ka kyrdan iakhun hadien ba ka la lah ba kan khur 5 tylli ki nam jop bad ba kan shah rem shisien bad ba kan khur 15 point, katba na ka liang ka Maram FC kan dei ka namrem ba hynriew sien lynter, ia kaba na kane ka lympung kane ka kynhun kan kit shibun ki jingmyntoi kum shi bynta ka jingpynkhreh ba kan iakhun naka bynta ban rah biang ia ka nam kum ka lahduh ka Tura Super Division, kaban sa sdang noh shen.
Kumta kaba sah mynta ka long ia ki jingiakhun ki semifinal, ha kaba ka Nongkseh SSCC kan mih madan ba kan iakhun pyrshah ia ka Rymbai Shkenshynriah kaban long ha ka 29 tarik bad ban bynrap da ka jingiakhun ka Langsning FC pyrshah ia ka Shillong Lajong FC kaban long ha ka 30 tarik mynta u bnai Jymmang bad kine ki jingiakhun kin long ha ka por 6 baje janmiet ha SSA Stadium, Polo.
