Tura, Lber 20: u shongknor jong ka iing dorbar thawain ka Ri ba mynshuwa u PA Sangma u ba dei ruh u president jong ka seng NPP mynta ka sngi u la kynnoh ba ka seng Congress ka don hapoh ICU bad kan nym lah ban ieng ha kane ka election kaban wan. Kumba ka long mynta baroh ki seng ki bym dei na ka seng congress ki ia tylli kawei ban pynlait ia ka ri India na ka seng Congress.
Kumba ka long mynta na ka liang jong ka BJP kala rai ban buh kyrtong na ka bynta ka 1-Shillong hynrei da ka jingkyrpad ka jong u ka BJP kan kyrshan noh ia u Bah Paul Lyngdoh u kyrtong jong ka UDP.
U Purno u la ong ba u Bah Paul un long u briew u ba lah ban mih khmat ia ki paidbah jong ka dong shatei lam mih ngi jong ka Ri India.
Haba ia dei bad ka jingtyrwa ia kren ia suk ka seng lehnoh GNLA, na ka liang jong u PA Sangma u pdiang sngewbha ia kane ka jingkwah katei ka seng lehnoh u la ong ba ia ki soh kyrdot lah ban weng tang lyngba ki jingiakren kane ka dei ka jingshem ka jong u.
Ha kaba ia dei bad ka jingdawa ban ioh ia ka Garoland na ka liang jong u Purno u la ong ba kane ka dei ka mat kaba ha khmat eh kaba ka NPP ka buh bad ia kane la kyntup lang ha ka jingkular election jong ka seng.
U la ong ba ka Northeast ka dei ka bynta jong ka Ri India bad dei ki briew kane ka thain kiba la shah ktah ha ka thma China kiba la wan rung sha Arunachal Pradesh bad Bangladesh. U la ong ba ki briew ka NE ki tip ia ka ri India hynrei ki briew katei ka dewbah kim don jingtip ei ei ia kane ka thain.(SP News)
