Shillong, Risaw 25: Ka Seng Kur Warjri kan rakhe ia ka lyngkhuh arphewsan snem ka jinglong dorbar naduh u snem 1998. ka jingrakhe kan sdang mynta u snem bad kan sa kut haduh la shym snem 2023, lyngba ki kam ki ban tei ia ka imlang sahlang bad ha ryngkat ki kam byrngia ia ki khynnah bad samla khnang ba ka jingrakhe kan long ka ba phuh ba phieng.
Ka Dorbar Kur Warjri mynta u snem kan long ha Sohryngkham ha ka 11tarik Naiwieng, 2022 ha ka ba yn pynkup burom ia ki khun samla jong ka Kur ki ba jop sha kliar ha ki jingpule jongki. Kan don ruh ka jingsam khusnam sha kiwei ruh ki rangkynsai bad theikynsai ki ba la tyngshaiñ ha la ki kam lajong ki ba pher ba pher.
Kumta na ka liang ka Dorbar Seng Kur Warjri, ka kyrpad ia ki parakur parajait ban pyntip ia baroh ki kyrteng jong ki khun samla ki ba la jop shakliar ha ki jingpule naduh ka HSLC/ Matriculation shaneng ter ter bad ban phah jingtip ruh ia ka kyrteng jong ki khun samla ne rangbah ki ba la rasong palat liam ha la ki kam lajong katkum ki sap bad jingtbit kyrpang.
La kyrpad ia ki parakur ban pyntip ia kita ki khun samla bad rangbah ki ba kiew irat ha la ki kam ha u Phone No. 8794915872 ha lane shwa ka 31tarik Risaw, 2022. Ha kata ka sngi jong ka Dorbar Kur kan don ruh ka jingjied thymmai ia ki nongkitkam bad pynbiang ryntih ia baroh ki kam kur haduh ka ba kut snem.
Ka jingsdang ia ka rakhe arphewsan snem jong ka Dorbar Kur Warjri kan long da ka jingpyninam bad die ia ki syntiew lane Flower Exhibition and Sale naduh 1tarik haduh 4tarik, 2022 ha Forever Rosely Nursery, Pomlum, 7 Mile, Upper Shillong hadien 7Triap Guest House.
Ha kane ka jingpyninam bad die jingdie ka kynthup ruh ia kiwei kiwei ki kam byrngia paidbah. Ha ka ba iadei bad kane ka jingpyninam la khmihlynti ba kan long ka rong ka taw ban ia byrngia ha kane ka aiom synrai bad lada don mano mano ba kwah ban plie basa ha kita ki sngi ki lah ban pyntip ha u Phone No. 8131948844/ 9436307170.
Kumta la wer ia baroh ki paidbah na kylleng sawdong jong ka thaiñ ban wan shim bynta lem ha kata ka sngi rakhe lyngkhuh snem ba arphewsan jong ka Dorbar Kur Warjri. Kine ki jingpyntip ki long katkum ka kyrwoh jong u Bah Sunshine Warjri, Saiñpyniar, Seng Kur Warjri.
