Shillong, Rymphang 10: Ka lympung thohdur jong ki barikor riewlum ha Ri India ne Tribal Painting Camp la pynlong da ka Dr. Ram Dayal Munda Tribal Welfare Research Institute (TRI), Department of Schedule Tribe, Schedule Caste, Minority and Other Backward Classes Welfare, Government of Jharkhand ha ka shnong Patratu ka ba jngai kumba 30Km na ka nongbah Ranchi.
Da ki spah ngut ki barikor riewlum na ki khathynriew tylli ki jylla ha Ri India ki la ia shim bynta ha kane ka lympung ka ba la sdang naduh 28tarik Kyllalyngkot bad kan kut haduh 3tarik Rymphang, 2023. Ïa kane ka lympung la pynphuh pynphieng da u Shri. Adwaita Gadanayak, Director General, National Gallery of Modern Art, Ministry of Culture, Government of India.
Ha ka jingkren jong u, u la kynthoh ba ka mattithaw jong ki riewlum trairi ha kano kano ka bynta jong ka pyrthei ki la don lypa ia ka snap ba pynpaw ia kaei kaei ka ba long salonsar kum ka thohdur mynta.
U la kren mardor, “Ki barikor trairi la na rilum ne rithor ki la tip lypa ia ka saiñpyrkhat baiar jong ka pyrthei bad kim da suitñiew than lada ka imlang sahlang ne ki salonsari ki ithuh ne em ia ki kum ki briew ki ba don sap bad tbit ha ka thohdur”
Ha ka jingiakynduh kyrpang bad ki barikor na ka thaiñ shatei lammihngi ka Ri India, u Gadanayak u la pyntip ba u Myntri Rangbahduh ka Ri India, u Shri Narendra Modi u la kyntu kyrpang ban kyntiew ia ka thaiñ ha ka liang jong ka kam thohdur.
Ha kaba iadei bad kane, u la iathuh ba ka NGMA kan sa buhti ia ka shnat treikam ha ka nongbah Agartala ha jylla Tripura na ka bynta ban kyntiew ia ka Thohdur mynta bad ia ki barikor jong ka thaiñ Shatei Lammihngi ka Ri India.
Kumta u la kyntu jur ia baroh ki barikor jong ka thaiñ ba ki dei ban shiom kabu ia kane ka lad bad ban trei shitrhem na ka bynta ban pynroi bad pynneh ia la ka thohdur tynrai bad gha kajuh ka por ban byrshem katkum ka saiñdur jong ka thohdur mynta.
U Gadanayak u la kular ban kyntiew ia baroh ki kam mattithaw na ka thaiñ ban pynryngkat kyrdan kum kiwei kiwei ki bynta ha dewbah India, khnang ba ki barikor kin lah ban kiew irat bad ka thohdur tynrai kan rasong ha satlak ka Ri India bad sha palat pud.
Ki sur jingrwai bad ki jingshad tynrai ba bun rong jong ki riewlum na satlak ka Ri India ki long ki ba iphuh iphieng bad ka ba kham kongsan ka long ba ha ka khyndew trai jong ki riewlum Munda ha Jharkhand ki don ki khana hyndai ki ba tympang bad ki ba phalang ia ka mynsiem ieitri jong kita ki riewlum.
Ki khana ki ba kham shynna ki long shaphang u khlawait Birsa Munda u ba im ka jingim ba synlar, hynrei u ba ingtyrkhong ban beh krad ia ki phareng ki ba wan thombor ha kita ki spah snem ba la leit; bad kawei pat ka khan ka long shaphang kawei ka khyllud phareng ka ba iapbieit ia u wei u nongsharai blang tang namar ki sur myllung jong ka besli jong u. kita ki shijur ki la shlei ka jingieit thep mynsiem haduh ba ka la lam pat sha ka lanot ka ba syrtok haduh ba la shempap ki bapli ki shijur ba kyndeh jingieit markylliang.
Ha kajuh ka rukom ki durthoh ki la phalang ia ki snap tynrai bad ki jnit ki jnat jong ka thohdur mynnor na ki bynta bapher bapher kum ka Lanjiya Saura na Odisha, Warli na Maharashtra, Madhubani na Bihar, Bhil na Rajasthan, Kond na Madhya Pradesh, Pithura na Gujarat, Kuchipudi na Kerala, Jadopatiya na Jharkhand bad byllai kiwei kiwei ki rukom thohdur tynrai na ki deity jong ki paidbynriew bapher jong ka Ri India.
Napdeng ki jaitbynriew na ka thaiñ shatei lammihngi jong ka Ri India la mihkhmat da ki trairi na la ki jylla, ba kynthup ia ki barikor Santhali bad Rabha na Assam, ki barikor Mizo na Mizoram, barikor Mao na Nagaland, barikor Galo na Arunachal Pradesh, barikor Debbarman na Tripura and barikor Khasi na Meghalaya.
Ka long kaei kei ka ba phylla ba ñiar eh ban don ki barikor ba thoh ha sla na ka thaiñ, lait noh na ki Santhali, namar ba kiwei kiwei ki dei ki ba thohdur ba tylli met ki ba kynthup ruh ia ki dur na ki jaiñ ba thir ba thaiñ hi ki riewlum na la ki jaka.
Kumta ki dur-shab longblei (totemic) bad durmang ryntih (motif) jong ki deity rilum na ka thaiñ ki la long ki ba shohdur ban thoh dur ha slajaiñ (canvas) kum ki nongmuna ba pawdur bad ohshrong katkum la ki deity tynrai lajong.
Ha kawei pat ka liang, dei tang ka jong ki Khasi ba ym don kano kano ka snap pawdur ba shynna ha ka thohdur tynrai namar ba baroh ki jynthaw naduh ki shang ki kriah, ki marnar, ki mawbynna, ki dur iing dur sem ne kino kino ki bynta jong ka deity tynrai ki long ki ba ym ju don kano kano ka rukom ohshrong.
Jar la katta u Lalremruata Varte of Mizoram u thohdur tynrai jong ki Mizo da ka ba kyntiew rasong ia ka niam Khristan kum ka shlem ba ha kliar ban sharai ia ki paidbynriew Mizo.
U Lalhunkima u la sot na ki dur thoh ha mawbynna ki ba kynrei bha ha thaiñ Champhai ban pynwandur ha sladur jaiñ da ka ba buhti ruh na lade da ki katto katne ki snap tynrai ki ym da paw than ha kino kino ki thohdur tynrai Mizo.
U nonghikai ha ka salonsari thohdur ha Tripura, u Mrinmoy Debbarma u la thohdur ia u khlawait Birsa Munda na Jharkhand da ka saiñ pyrkhat lajong ban pawdur la ka sap tynrai lajong.
U Ranjit Rabha bad Samudra Gupta na Assam ki la thohdur ia ka durkhmat jong u Birsa Munda ha jamdien jong ka deiti tynrai Rabha lajong kum ban tehsong ia ka jinglong riewlum salonsar.
Ka Florence Lohu na ka jaitbynriew Mao ka la thohdur ia ki puidkhmat jong ka jaitbynriew lajong la kumba sot na ki jaiñ tynrai ba bunrong jong ki Naga. U Ejum Rib ana Arunachal Pradesh u la pynsyriem ia u Khlawait Birsa Munda kum u Napoleon jong ka Ri France.
U Raphael Warjri u la thohdur ia u khlawait Birsa Munda kum u briew ba im synlar, hynrei u ba don ka mynsiem ka ba khia jingmut ia la ka jaitbynriew ha ka ba la byrshem bad ka jinglong jong ki khlawait riewlum lajong, ki ba angnud ban pynher krad ia ki mynder ki ba wan thombor.
