Shillong, Jylliew 24: Pynbam smai u bah Samuel B Jyrwa ia ki nongkit kam kiba dang shah jied thymmai jong ka seng samla pule ka Khasi Student Union (KSU) ha ka jingilang kaba la long mynta ka sngi, ia kaba ki hap ban shim ia ka jingsmai ban long ki nongkit kam kiba pura katkum ka kyndon kaba lai jong ka riti treikam ka seng na ka bynta samoi trei kam 2023-2026.
Kiba la shim ia ka jingbam smai ki long u President u bah Lambokstarwell Marngar, General Secretary samla Donal V Thabah bad ia baroh kiwei ki nongkit kam hapoh ka seng kmie, da kaba shim ia kane ka jingsmai mynta ka sngi katkum ki kyndon kiba ka seng kala buh.
Ha ka jingkren u President jong ka seng u samla Lambokstarwell Marngar la ong ba seng im ha ka juk jong ka jingkylla, ka jingtyrha bad ka jingtynjuh ka sdang ruh nala rympei, ka jingma kaba sniew tam ka long ba kita ki khun samla kiba ia khmih lynti leh se kin sa khyllem ha kata ka jingtynjuh.
Kane ka dei ka por jong ka jingkhot, ka dei ka por ban ia pyrkhat bad ka por ban ia saindur thymmai, baroh kiba la kren ieit ri hynrei katno ngut kiba la len na ka bynta ka ri, kane ka dei ka spah snem kaba arphew wei bad ka jingnang jingstad kala sdang ban synshar wat ha kane ka jaidbynriew ka jong, hynrei kaba sngewsih ka long ba ka jingiatip lem bad ka jingkit khlieh kala sdang ban hiar bad sdang ban iaptram.
U President ka seng u la kdew ba ka sain pyrkhat kaba na shabar kala sdang ban rung bad pynpra ia ka sain pyrkhat tynrai jong ka jiaidbynriew bad kita ki long ki dak ki shin kiba ap ba ioh lehse kum ka jaidbynriew ba ioh leh se ha kawei ka sngi yn sa sah jop ha ka rukom pyrkhat pyrdain.
Ka spah snem kaba la leit ki dohlieh kila hiar thma da ka bor daki tup bad da ki man, kane ka spah snem kaba mynta shah hiar thma da ka jingpyrkhat, ka jot ka pra ka jaidbynriew dei na ka sain pyrkhat kaba na shabar, laong ba ka jingkren kam dei tang ia ki kdhot ka KSU hynrei ia ki samla kiba lanoh syniang ia ka jaidbynriew hala ki jong ki jong ki jylli.
Ka kyntu ba to shim ia ka jingkylla kaba thymmai ban sngewthuh bad ban pynkhlain na lade ba kata ka bor pyrkhat kaba na shabar kam dei ban long halor ka rukom pyrkhat pyrdain u khasi paka naduh ki kulong kumah, hala ka bor ba rit kum ka seng kala kynduh ia ka sorkar hapdeng ki jingduna kum ki briew, haba ki kren ia ki mat ka long ban pynim ia ka jaidbynriew baroh kawei.
Haba ia kren ia ka Inner Line Permit kaba ka sorkar jylla kala shim ia ka rai hapoh ka iing dorbar ruh ha u snem 2019 hynrei haduh mynta ym tip kata ka rai ka thiah hangno ruh ym tip, ka jingkylli ka long hato ki la leit tied jingkhang mo man ka por ban pyntreikam ia ka ILP, ban pynrung ia ka ktien khasi ha ka khyrngit kaba phra.
Kaba sngewsih la ioh ba ha kine ki sngi la wan iuh kjat kita ki nongialam na Delhi kiba dei na kawei ka party kaba baroh ki iatip la ong ba um don jigntip ei ei shaphang kata ka ILP, ka kyrwoh kaba shai ba ka seng ka kwah ban phah sha ka sorkar jylla khamtam sha ka sorkar pdeng Hooid en em halor ka ILP, lada ka dang kuman sah kum ki khun samla ki hap ban pyrkhat da kawei ka lynti lada sam kuman palat kan klang ha kawei ka sngi, ka KSU kam juh kyrkhuh tang ka ktien ka leh da ka kam ruh.
Haba phai sha ka ioh kam ioh jam ka sorkar kala dei ban don noh ia kata ka polisi ban btin lynti ia ki khun samla ban ioh kam ha ki kam bapher bapher bad ban pynthikna ba ka Education Polisi kan long kaba bit ba biang na ka bynta ka jingmyntoi ki khun samla ha ka jylla baroh kawei, ki karkhna kila ai kam ne ki dei tang ki nongwan kjit ia ka jylla.
U President ka KSU la ong ba “Ngi dei shuwa ki khun jong u khun Khasi Khara bad ka niam ka sawan ha dien, wat ailat ba ka niam kan long halor ban pynjot pynpra ia ka jaidbynriew jong ngi” la kdew ia kaei kaba la jia hapoh ka jylla Manipur.
